BAKI,VOA,Yusif Şərifzadə

Yaxın Şərq İnstitutunun baş elmi əməkdaşı Ross Harrison İsveçrədə keçirilən ABŞ–İran danışıqlarını müsbət, lakin uzunmüddətli prosesin başlanğıcı kimi dəyərləndirib.

VOA xəbər verir ki, son yüksək səviyyəli danışıqların İslamabadda nəticəsiz başa çatmasına baxmayaraq, bu dəfə proses daha ümidverici görünür.

Harrison bildirib ki, ABŞ və İran mövqeləri arasında müəyyən simmetriya müşahidə olunur və ilkin razılaşmanın əsas konturları artıq formalaşıb.

O qeyd edib ki, danışıqlarda üç əsas dinamika diqqətdə saxlanmalıdır: prosesin özü, deeskalasiya mexanizmləri və Beynəlxalq Atom Enerjisi Agentliyinin (BAEA) müfəttişlərinin fəaliyyəti.

Ekspertin fikrincə, həm Vaşinqton, həm də Tehran hesab edir ki, müharibə meydanından daha çox danışıqlar masasında qazanc əldə etmək mümkündür.

Lakin o bildirib ki, ən çətin mərhələ siyasi amillərlə bağlıdır və bu, Vaşinqton, Tehran və Təl-Əvivdəki daxili siyasi vəziyyətdən asılı olacaq.

Harrison əlavə edib ki, hazırda ən böyük maneə Livanın cənubundakı vəziyyətdir.

Onun sözlərinə görə, İranın Hizbullah üzərində təsir imkanları olsa da, ABŞ-ın İsrail üzərində nə qədər təsir göstərə biləcəyi və İsrailin bu çağırışlara hansı dərəcədə əməl edəcəyi hələ də qeyri-müəyyəndir.