BAKI,VOA,Yusif Şərifzadə

Pakistanın baş naziri Şahbaz Şərif son 24 saat ərzində ABŞ və İran arasında mümkün razılaşma ilə bağlı optimist açıqlamalar verib və prosesin tezliklə başa çatdırılmasının vacibliyini vurğulayıb.

VOA xəbər verir ki, Şahbaz Şərif bildirib ki, tərəflər əsas prinsiplər üzrə razılığa yaxınlaşıb və artıq prosesi uzatmadan sənədin rəqəmsal şəkildə imzalanması və ilkin mərhələnin təsdiqlənməsi daha məqsədəuyğun olardı.

Onun sözlərinə görə, məqsəd növbəti 30–60 günlük mərhələyə keçmək, Hörmüz boğazında gərginliyi azaltmaq, İran aktivlərinin dondurulmasının aradan qaldırılması və nüvə zənginləşdirmə məsələsində uzunmüddətli çərçivənin müəyyənləşdirilməsidir.

Rəsmilər bildirirlər ki, ilkin mərhələdən sonra danışıqların daha çətin və texniki hissəsi Cenevrə, İslamabad və ya Vyanada Beynəlxalq Atom Enerjisi Agentliyi çərçivəsində davam etdirilə bilər.

Pakistan tərəfinin bu prosesdə region ölkələri, o cümlədən Misir, Türkiyə və Səudiyyə Ərəbistanı ilə koordinasiyada hərəkət etdiyi, həmçinin Çinlə açıq kommunikasiya saxladığı qeyd olunur.