BAKI,VOA Orxan Qədirzadə

ABŞ Prezidenti Donald Tramp ABŞ və Nigeriya qüvvələrinin birgə əməliyyatı nəticəsində terror təşkilatı İŞİD-in qlobal səviyyədə ikinci əsas fiquru hesab edilən Əbu-Bilal əl-Minukinin zərərsizləşdirildiyini açıqlayıb.

VOA xəbər verir ki, Donald Tramp sosial media hesabında paylaşdığı məlumatda bildirib ki, Əbu-Bilal əl-Minuki Afrikada gizlənməyə çalışsa da, kəşfiyyat məlumatları onun yerinin müəyyən edilməsinə imkan verib. ABŞ liderinin sözlərinə görə, həyata keçirilən əməliyyat uzun hazırlıq tələb edən və mürəkkəb plan əsasında təşkil olunan hərbi fəaliyyət olub.

Tramp qeyd edib ki, əməliyyatın məqsədi Afrikada terror təhlükəsinin azaldılması və ABŞ maraqlarına qarşı mümkün hücum planlarının qarşısının alınması olub. O, Nigeriya hökumətinə əməkdaşlığa görə təşəkkür edib.

Məlumata görə, Əbu-Bilal əl-Minuki 2018-ci ildə əvvəlki regional lider Məmmən Nurun ölümündən sonra təşkilatın Qərbi Afrika qanadında rəhbər vəzifəyə yüksəlib. O, sərt xətt tərəfdarı kimi tanınırdı və 2023-cü ildən ABŞ tərəfindən terrorçu siyahısına daxil edilmişdi.

Ekspertlər hesab edirlər ki, belə yüksək səviyyəli şəxsin sıradan çıxarılması terror təşkilatının regional fəaliyyətinə və əməliyyat imkanlarına təsir göstərə bilər.