BAKI,VOA Orxan Qədirzadə

Pekin şəhərində ABŞ Prezidenti Donald Trampın Çin Xalq Respublikasının Sədri Si Cinpin ilə görüşmək üçün eniş etdiyi vaxt çəkilən bir video sosial şəbəkələrdə geniş rezonans doğurub.

VOA xəbər verir ki, Britaniyanın “Daily Mail” qəzetinin Ağ Evi izləyən müxbiri Con Maykl Raş Trampın təyyarəsinin Pekin hava limanına enişini gözlədiyi zaman həmin anları telefon kamerası ilə qeydə alıb. O, videoda Çin əsgərinin tam hazır vəziyyətdə dayanaraq, ABŞ prezident təyyarəsi onun arxasından keçərkən heç bir reaksiya vermədiyini lentə alıb.

Müxbir videoya münasibət bildirərək, “Bu insan heç göz qırpmadı, təyyarənin mühərrik səsi çox güclü idi” sözlərini qeyd edib.

Sosial şəbəkələrdə paylaşım edildikdən dərhal sonra video sürətlə yayılıb və geniş müzakirələrə səbəb olub. Çoxsaylı istifadəçilər görüntünü Çin ictimaiyyətində simvolik bir nümunə kimi dəyərləndiriblər. Bəzi şərhlərdə həmin hərbçinin Çin Xalq Azadlıq Ordusunun fəxri qarovul dəstəsinə aid olduğu vurğulanaraq, onun daim dik dayanmaq üçün hazırlanmış hərbçi olduğu qeyd edilib.

Şərh yazanlardan bəziləri bu görüntünü Çin hərbi nizam-intizamının göstəricisi kimi qiymətləndirərək, “Bu əsgər bütün Amerika heyətini heyrətləndirdi. O, əmrlərə tam riayət edərək bir an belə tərpənmədi, sanki canlı heykəl kimi dayanmışdı” fikirlərini irəli sürüblər.

Digər istifadəçilər isə hadisənin psixoloji və hərbi nizam-intizam baxımından əhəmiyyətini önə çəkərək, yüksək səsli mühərriklərin yaratdığı təzyiqə baxmayaraq əsgərin tam hərəkətsiz qalmasını diqqətə çatdırıblar. Onların fikrincə, bu cür davranış Çin ordusunda nizam-intizam və hazırlıq səviyyəsinin göstəricisi kimi qəbul edilir.

Sosial media istifadəçiləri həmçinin bu görüntünün qlobal miqyasda Çin hərbi imicinə dair təsəvvürləri gücləndirdiyini bildirərək, əsgərin “dövlət nizam-intizamının simvoluna çevrildiyini” qeyd ediblər. Bəzi şərhlərdə onun bu davranışının Çin mədəniyyətində intizam və qaydalara sədaqət anlayışını əks etdirdiyi vurğulanıb.

Digər tərəfdən, ABŞ-dan bəzi sosial media hesabları hadisəyə fərqli yanaşma ortaya qoyub. Həmin paylaşımlarda yayılan görüntünün daha geniş versiyasına istinad edilərək, əsgərin təyyarədən kifayət qədər uzaqda olduğu və vəziyyətin qeyri-adi təhlükə yaratmadığı iddia olunub. Bu yanaşmaya görə, viral olan görüntü hadisənin dramatik təsirini artırmaq üçün yanlış şərh edilib.

Hadisə ilə bağlı müzakirələr davam edir və görüntü həm Çin, həm də ABŞ ictimaiyyətində fərqli baxışların formalaşmasına səbəb olub.