BAKI,VOA, Fərid Mikayılov

Halmahera adasında yerləşən Dukono vulkanının püskürməsi zamanı üç nəfər həlak olub. Ölənlərin iki nəfərinin Sinqapur vətəndaşı, bir nəfərinin isə yerli turist olduğu bildirilir.

VOA xəbər verir ki, hadisə zamanı vulkanın yamaclarında ümumilikdə 20 nəfər olub. Güclü püskürmə nəticəsində havaya təxminən 10 kilometr hündürlüyündə kül və tüstü sütunu qalxıb.

Bildirilib ki, xilasedicilər təhlükəli şərait səbəbindən hələ də ölən şəxslərin cəsədlərini ərazidən çıxara bilməyiblər. Vulkan aktivliyinin davam etməsi axtarış-xilasetmə əməliyyatlarını çətinləşdirir.

Rəsmilər qeyd edib ki, turistlər qadağan olunmuş əraziyə daxil olublar. Vulkanologiya və Geoloji Təhlükələrin Azaldılması Mərkəzi hələ ötən ilin dekabrından etibarən əraziyə yaxınlaşmamaq barədə xəbərdarlıq etmişdi.

Hadisədən sonra bələdçi və yükdaşıyan şəxs polisə aparılıb və onların barəsində cinayət işi açıla biləcəyi bildirilib.

Qeyd edək ki, İndoneziya Sakit okeanın “Odlar Halqası” adlanan seysmik zonasında yerləşdiyi üçün ölkədə vulkan püskürmələri və zəlzələlər tez-tez baş verir. Ölkədə 130-a yaxın aktiv vulkan mövcuddur.