BAKI,VOA, Orxan Qədirzadə

ABŞ-ın Müdafiə naziri Pit Hegseth, İranla davam edən müharibə ilə bağlı Konqresdə keçirilən ilk dinləmələrdə demokrat millət vəkillərinin sərt ittihamları ilə üzləşib.

VOA xəbər verir ki, nazir, müharibənin strateji hədəfləri və ABŞ əsgərlərinin təhlükəsizliyi ilə bağlı ictimaiyyəti aldatmaqda günahlandırılır.

Hegsethə ittihamlar

Nümayəndələr Palatasının Silahlı Qüvvələr Komitəsində keçirilən 29 aprel tarixli iclasda çıxış edən demokrat millət vəkili Con Qaramendi, Hegsethi müharibənin səbəbləri və gedişatı barədə "ilk gündən yalan danışmaqda" ittiham edib. Qaramendi bu münaqişəni "Trampın müharibəsi" adlandıraraq, ABŞ-ın özünə vurduğu ağır zərbə, qlobal iqtisadi böhrana yol açan "geosiyasi fəlakət" və "bataqlıq" kimi xarakterizə edib.

Hegsethin müdafiəsi və büdcə tələbi

İranın Hörmüz boğazını bağlaması və artan neft qiymətləri fonunda çıxış edən Hegseth, bütün risklərin qiymətləndirildiyini bildirib. O, müharibənin indiyədək 25 milyard dollara başa gəldiyini təsdiqləyib. Pentaqon rəhbəri tənqidlərə cavab olaraq: "İranın nüvə silahına sahib olmamasının qiyməti nədir?" sualını verərək, 2027-ci il üçün müdafiə büdcəsinin 42% artırılaraq 1.5 trilyon dollara çatdırılmasını tələb edib.

Əsgər ölümləri və gizli məlumatlar

Dinləmələrdə xüsusilə Küveytdə 6 ABŞ əsgərinin ölümü ilə nəticələnən hücum zamanı müdafiə tədbirlərinin yetərsizliyi müzakirə mövzusu olub. Millət vəkilləri Hegsethin bu hadisənin təfərrüatları barədə Konqresi və ictimaiyyəti yanlış yönləndirdiyini iddia edərək rəsmi təhqiqat tələb ediblər. Xatırladaq ki, fevralın 28-dən başlayan hərbi əməliyyatlarla bağlı Konqresin əvvəlcədən məlumatlandırılmaması konstitusiya pozuntusu kimi qiymətləndirilir.