BAKI,VOA, Fərid Mikayılov

Avropa İttifaqında iki aydır davam edən maliyyə mübahisəsi həllini tapıb.

VOA xəbər verir ki, Avropa İttifaqı Macarıstanın vetonu geri götürməsindən sonra Ukraynaya ayrılacaq 90 milyard avroluq kredit paketini yekdilliklə təsdiqləyib.

Məlumata görə, bu qərarla Viktor Orbanın mövqeyi səbəbindən yaranmış böhran aradan qaldırılıb. Qərar əvvəlcə səfirlər səviyyəsində razılaşdırılıb, daha sonra isə yekun təsdiqini alıb.

Qeyd edilir ki, kredit paketinin ilk tranşının “mümkün olan ən qısa müddətdə” Ukraynaya köçürülməsi planlaşdırılır. Maliyyə proqramını Avropa Komissiyası idarə edəcək.

Ukrayna Prezidenti Volodimir Zelenski bu addımı “doğru siqnal” kimi qiymətləndirərək bildirib ki, Rusiyaya qarşı təzyiqin artırılması və Ukraynaya dəstəyin gücləndirilməsi münaqişənin həlli üçün vacibdir.

Maliyyə paketinə əsasən, 2026-cı ildə 45 milyard avronun mərhələli şəkildə ayrılması nəzərdə tutulur. Bu məbləğin 16,7 milyard avrosu maliyyə, 28,3 milyard avrosu isə hərbi dəstək üçün istifadə olunacaq. Qalan hissənin isə 2027-ci ildə verilməsi planlaşdırılır.

Eyni zamanda qeyd olunub ki, vəsaitlərin ayrılması Ukraynada aparılacaq islahatlara bağlı olacaq və korrupsiya ilə mübarizədə geriləmə baş verərsə, ödənişlər dayandırıla bilər.