BAKI,VOA, Fərid Mikayılov

Ukrayna Macarıstan tərəfindən müsadirə edilmiş iri məbləğdə vəsaitlərin geri qaytarılmasını tələb edir.

VOA xəbər verir ki, Ukrayna Prezidenti Volodimir Zelenski Macarıstanın ölkəyə məxsus inkassator vəsaitlərini qaytarmasını istədiyini açıqlayıb.

Onun sözlərinə görə, rəsmi Kiyev bu məsələni Macarıstanda parlament seçkilərində qalib gəlmiş “Tisa” partiyasının lideri Peter Maqar ilə müzakirə edəcək.

Prezident bildirib ki, sözügedən vəsaitlər Ukraynanın dövlət bankı olan Oşadbanka məxsusdur və onların geri qaytarılması Kiyev üçün prioritet məsələdir. Zelenski, həmçinin Macarıstanın Baş naziri Viktor Orbanı sərt tənqid edərək vəsaitlərin qanunsuz şəkildə saxlanıldığını iddia edib.

Qeyd edək ki, martın 6-da Macarıstan ərazisində Ukraynaya məxsus inkassatorlar saxlanılıb. Onlar Avstriyadan ölkəyə təxminən 40 milyon ABŞ dolları, 35 milyon avro və 9 kiloqram qızıl aparırdılar. Hadisədən sonra Budapeşt rəsmi Kiyevə boş inkassator avtomobillərini qaytarsa da, daşınan pul və qızıl ölkədə saxlanılıb.