BAKI,VOA, Fərid Mikayılov

Ukrayna Prezidenti Volodimir Zelenski qarşıdakı aylarda ölkəsi üçün siyasi və diplomatik vəziyyətin mürəkkəbləşəcəyini bildirib.

VOA xəbər verir ki, Zelenski jurnalistlərlə görüşündə ABŞ-nin Rusiya-Ukrayna müharibəsini dayandırmaq üçün danışıqları sentyabr ayına qədər yekunlaşdırmağa çalışdığını qeyd edib.

Onun sözlərinə görə, bu səbəbdən yaz və yay dövrü Ukrayna üçün asan olmayacaq.

Məlumata əsasən, Ukrayna lideri daha əvvəl ABŞ, Ukrayna və Rusiya arasında üçtərəfli danışıqların keçirildiyini xatırladaraq bu prosesin davam etdirilməsinin vacibliyini vurğulayıb. O bildirib ki, gərginliyin azalması halında yeni görüşlər aprel, may və ya iyun aylarında baş tuta bilər.

Zelenski qeyd edib ki, ABŞ bu prosesi sürətləndirmək niyyətindədir və yaxın aylarda Ukraynaya həm siyasi, həm də hərbi baxımdan təzyiqlərin artması mümkündür.

Eyni zamanda, o vurğulayıb ki, Ukrayna milli maraqlarını qorumaqla fəaliyyətini davam etdirəcək və Rusiyaya qarşı beynəlxalq təzyiqin artırılması mühüm əhəmiyyət daşıyır.

Bildirilib ki, Zelenski Rusiya ordusunun cəbhədə itkilər verdiyini desə də, eyni zamanda Ukrayna ərazisində rus hərbi qüvvələrinin sayının artdığını qeyd edib. Onun sözlərinə görə, Rusiya strateji ehtiyatlardan istifadə edərək qüvvələrini gücləndirir.

Ukrayna lideri həmçinin Yaxın Şərq ölkələri ilə müdafiə sahəsində əməkdaşlıq etdiklərini, İran istehsalı pilotsuz uçuş aparatlarına qarşı mübarizə çərçivəsində bir neçə ölkədə uğurlu əməliyyatlar həyata keçirdiklərini bildirib.