BAKI,VOA, Fərid Mikayılov

Şimali Koreya ilə əlaqəli haker qrupları ABŞ-da minlərlə şirkətin istifadə etdiyi proqram təminatına sızaraq genişmiqyaslı kibertəhlükəsizlik böhranına səbəb olub.

VOA xəbər verir ki, təhlükəsizlik mütəxəssislərinin məlumatına görə, hücum açıq mənbəli proqram təminatının inkişaf etdirici hesabına daxil olunması ilə həyata keçirilib və bu müddətdə istifadəçilərə zərərli yeniləmələr göndərilib.

Məlumata əsasən, hakerlər təxminən üç saat ərzində sistemə nəzarəti ələ keçirərək proqramı yükləyən təşkilatların şəbəkələrinə sızmağa nail olublar. Hücum nəticəsində artıq onlarla şirkətin yüzdən çox cihazının zərər gördüyü müəyyən edilib.

Ekspertlər bildirir ki, bu hücum klassik “təchizat zənciri hücumu” xarakteri daşıyır və təsirlərinin aradan qaldırılması aylarla davam edə bilər.

Araşdırmalar göstərir ki, hücumun əsas məqsədi əldə edilən sistem girişlərindən istifadə edərək kriptovalyuta oğurluğu həyata keçirməkdir. Xüsusilə maliyyə və texnologiya sektorunun bu hücumdan daha çox zərər görəcəyi ehtimal edilir.

Beynəlxalq təhlükəsizlik qurumları qeyd edir ki, Şimali Koreya uzun illərdir kibercasusluq fəaliyyətlərini ölkənin əsas maliyyə mənbələrindən birinə çevirib. Müxtəlif hesabatlara görə, bu ölkə ilə əlaqəli qruplar son illərdə milyardlarla dollar dəyərində vəsait əldə edib.

Ekspertlərin fikrincə, bu cür hücumlar həm qlobal maliyyə sistemləri, həm də rəqəmsal təhlükəsizlik üçün ciddi risklər yaradır və yaxın dövrdə oxşar əməliyyatların davam edəcəyi istisna edilmir.