BAKI,VOA, Fərid Mikayılov
İran ətrafında artan gərginlik fonunda Almaniya hökuməti mövqeyini açıqlayıb. Rəsmi Berlin ABŞ və İsrailin İrana qarşı həyata keçirdiyi hərbi əməliyyatların NATO-nun müharibəsi olmadığını və Almaniyanın bu əməliyyatlarda iştirak etməyəcəyini bəyan edib.
VOA xəbər verir ki, Almaniya hökumətinin sözçüsü Stefan Kornelius Berlində keçirilən brifinqdə çıxış edərək bildirib ki, NATO müdafiə ittifaqıdır və mövcud münaqişə alyansın səlahiyyətlərinə daxil deyil.
Korneliusun sözlərinə görə, hərbi əməliyyatların genişlənməsi Yaxın Şərq və Körfəz bölgəsindəki tərəfdaş ölkələr üçün ciddi təhlükələr yarada bilər. O qeyd edib ki, Almaniya hökuməti həm NATO-nun mandatını, həm də ölkənin münaqişədə iştirak məsələsini aydın şəkildə qiymətləndirir.
Almaniyanın xarici işlər naziri Yohann Vadeful da ölkəsinin İran ətrafında yaranmış gərginlik fonunda beynəlxalq hərbi əməliyyata qatılmayacağını təsdiqləyib.
Onun sözlərinə görə, bu mövqe kansler Fridrix Merts və müdafiə naziri Boris Pistorius tərəfindən də açıq şəkildə ifadə olunub.
Yohann Vadeful qeyd edib ki, Almaniya mümkün diplomatik danışıqlarda iştirak etməyə hazırdır. Onun fikrincə, Hörmüz boğazında təhlükəsizliyin uzunmüddətli təminatı yalnız diplomatik danışıqlar və İranla aparılacaq siyasi dialoq vasitəsilə mümkün ola bilər.
Nazir eyni zamanda Avropa İttifaqının Qırmızı dənizdə gəmiçilik təhlükəsizliyini qorumaq məqsədilə başladığı “Aspides” hərbi missiyasının gözlənilən nəticəni vermədiyini bildirib.
Vadeful əlavə edib ki, bu missiyanın Hörmüz boğazına genişləndirilməsi əlavə təhlükəsizlik yaradıb-yaratmayacağı sual altındadır.
Almaniyanın xarici işlər naziri İranın regional siyasətini də tənqid edib. Onun sözlərinə görə, Tehran Livan, İraq və Yəməndə fəaliyyət göstərən Hizbullah, HƏMAS və husilərə dəstək verir.
Nazir bildirib ki, İran rejimi həm daxili, həm də xarici siyasətdə ədalətsiz davranır və İsrailin təhlükəsizliyinə təhdid yaradır.
Vadeful həmçinin qeyd edib ki, Yaxın Şərqdəki münaqişə həll olunmadan neft qiymətlərinin sabitləşməsi çətin olacaq.