BAKI,AzerVoice

Amerika şirkətləri Venesuelanın neft sənayesinin bərpasına milyardlarla dollar sərmayə qoyacaq.

AzerVoice-un şənbə günü verdiyi məlumata görə, bunu ABŞ Prezidenti Donald Tramp bu gün keçirilən mətbuat konfransında deyib.

“Venesuelanın neft sənayesi uzun müddət dərin tənəzzül vəziyyətində olub. Neft hasilatının həcmi ölkənin malik olduğu və reallaşdıra biləcəyi potensialla müqayisədə demək olar ki, yox səviyyəsində idi. Bu sahəyə dünyanın ən iri Amerika neft şirkətləri cəlb olunacaq. Onlar milyardlarla dollar sərmayə qoyacaq, ciddi şəkildə dağıdılmış neft infrastrukturunu bərpa edəcək və ölkə iqtisadiyyatına gəlirlərin daxil olmasını təmin edəcəklər”, - deyə o bildirib.

Tramp vurğulayıb ki, zərurət yaranarsa, ABŞ ikinci, daha genişmiqyaslı əməliyyatı həyata keçirməyə hazırdır.

“Əvvəlcə ikinci mərhələnin lazım olacağı güman edilirdi, lakin hazırda buna ehtiyacın olmayacağı ehtimal olunur. Birinci mərhələ - belə demək mümkünsə - o qədər uğurlu oldu ki, ikinci mərhələyə, böyük ehtimalla, ehtiyac qalmayacaq. Bununla belə, biz buna tam hazırıq: söhbət xeyli daha böyük əməliyyatdan gedir. Hazırkı addımlar nöqtəvi xarakter daşıyırdı, lakin bizim daha genişmiqyaslı ssenarimiz də var və böyük ehtimalla, onu tətbiq etməyə ehtiyac olmayacaq”, – deyə ABŞ prezidenti qeyd edib.

O bildirib ki, imkanları və əldə etdiyi nailiyyətləri sayəsində bütün dünyanın əməkdaşlıq etməyə can atdığı Amerika Birləşmiş Ştatları ilə Venesuelanın tərəfdaşlığı venesuela xalqını varlı, müstəqil və təhlükəsiz edə bilər.

“Bu, eyni zamanda ABŞ-da yaşayan çoxsaylı venesuelalılar üçün də rahatlıq və sevinc gətirəcək. Onlar uzun müddət əziyyət çəkiblər, onlardan çox şey alınıb. Bu əzablara son qoyulacaq. Qeyri-legitim diktator Nikolas Maduro ABŞ ərazisinə ölümcül dərəcədə təhlükəli qanunsuz narkotiklərin nəhəng həcmdə qaçaqmalçılığına cavabdeh olan geniş cinayət şəbəkəsinin əsas fiquru olub”, – deyə Tramp bildirib.