BAKI, AzerVoice, Nailə Babazadə

Filipinlərin Palompon bölgəsinin qərbində, 30 sentyabrda baş verən 6,9 bal gücündə zəlzələdə həyatını itirənlərin sayı 72-yə çatıb.

AzerVoice xəbər verir ki,Palomponun qərbində və Cebu əyalətinin sahilində baş verən zəlzələdən sonra itkilər artmaqda davam edir.

Milli Fəlakət Risklərinin Azaldılması və İdarəetmə Şurasından (NDRRMC) verilən açıqlamada, 6,9 bal gücündə zəlzələdə ölənlərin sayının 72-yə yüksəldiyi bildirilib.

Açıqlamada, 47min 221 nəfərin zəlzələdən təsirləndiyi və ən çox ölümün Orta Visayas bölgəsində baş verdiyi qeyd olunub.

Zəlzələdə ümumilikdə 597 evin zədələndiyi, bunlardan 501-nin "qismən zədələndiyi", 96-nın isə "tamamilə dağıldığı" vurğulanıb.

Qeyd edək ki, Filipinlərin Palompon bölgəsinin qərbində 30 sentyabrda 6,9 bal gücündə zəlzələ baş vermişdi. Filipinlər Qırmızı Xaçının rəhbəri Richard Gordon zəlzələ zamanı bəzi kilsələrin qismən uçduğunu və bəzi məktəblərin boşaldıldığını bildirmişdi.

Dünyada seysmik fəaliyyətlərin ən çox müşahidə olunduğu ölkələrdən biri olan Filipinlər, "od halqası" kimi tanınan Sakit Okean Zəlzələ Qayışı bölgəsində yerləşir.