BAKI, AzerVoice, Nailə Babazadə

Zimbabve bu il qarğıdalı istehsalında müşahidə olunan artımdan sonra bu məhsulun idxalını qadağan edib.

AzerVoice xəbər verir ki, Zimbabve Kənd Təsərrüfatı Nazirliyinin yaydığı açıqlamada son illərdə yaşanan quraqlıqdan sonra bu il yağıntıların müntəzəm keçməsi nəticəsində qarğıdalı istehsalında bol məhsul əldə edildiyi bildirilib.

Açıqlamada məhsul bolluğu və fermerlər üçün təhlükəsiz bir bazar yaradılması məqsədilə qarğıdalı idxalının qadağan edildiyi qeyd olunub.

Qadağanın müvəqqəti xarakter daşıdığına diqqət çəkilən açıqlamada, gələcək illərdə istehsalın kifayət etməyəcəyi təqdirdə idxalın yenidən gündəmə gələ biləcəyi vurğulanıb.

Zimbabvedə geniş istehlak olunan qarğıdalı məhsulları əhalinin əsas qida mənbələrindən biri hesab olunur.

ABŞ Kənd Təsərrüfatı Nazirliyinin məlumatına görə, Afrikanın cənubunda müşahidə olunan quraqlıq səbəbilə Zimbabvedə qarğıdalı istehsalı 2024-cü ildə əvvəlki illə müqayisədə təxminən 60 faiz azalmış və illik 635 min ton səviyyəsinə düşmüşdü.

Bu il yağıntıların müntəzəm olması nəticəsində qarğıdalı istehsalı ötən illə müqayisədə 100 faizdən çox artaraq 1,3 milyon ton səviyyəsinə çatıb.