BAKI, AzerVoice

Livanın bir qrup deputat və siyasətçisi çərşənbə günü “Hizbullah”ın baş katibi şeyx Nəim Qasim barəsində Baş prokuror Cəmal Həccara rəsmi şikayət təqdim edib.

“Livan Milli İnformasiya Agentliyi”nin məlumatına görə, şikayəti deputatlar İlyas Xuri, Əşrəf Rifi, Kamil Şamun, Corc Aqis, sabiq deputat Edi Əbi Ləma və “Dəyişiklik Hərəkatı”nın rəhbəri vəkil İli Mahfuz imzalayıb. Onların şikayəti Beyrutdakı Ədliyyə Sarayında qeydiyyata alınıb və sənəddə Nəim Qasimlə yanaşı istintaq nəticəsində müəyyən olunacaq bütün şəriklər, iştirakçılar və təhrikçilərin də məsuliyyət daşıdığı vurğulanıb.

Şikayət deputatların sözlərinə görə, Qasimin 15 avqust tarixindəki çıxışına əsaslanır. Həmin çıxışda “Hizbullah” baş katibi “müqavimətin silahı təhvil verməyəcəyini”, “işğalın davam etdiyini” bildirərək, lazım gələrsə, “Kərbəla savaşı”na bənzər mübarizə aparacaqlarını söyləmişdi. O həmçinin İsrail–ABŞ layihəsinə qarşı istənilən qiymətə mübarizə aparacaqlarını və qələbəyə əmin olduqlarını vurğulamışdı.

Nəim Qasim hökuməti də hədələyərək “ölkədə baş verə biləcək hər cür fitnə, daxili toqquşma və dağıntının məsuliyyətinin Livan hökumətinin üzərində olacağını” bəyan etmişdi.

Deputatlar bu açıqlamaları “dövlətin konstitusion qərarlarına qarşı təhdid və fitnə çağırışı” kimi qiymətləndirərək məhkəməyə müraciət ediblər.