BAKI, AzerVoice, Nailə Babazadə

Birləşmiş Millətlər Təşkilatının (BMT) Baş katibi Antonio Quterreş Türkmənistanın Avaza turizm bölgəsində keçirilən Dənizə çıxışı olmayan inkişaf etməkdə olan ölkələrin (LLDC) 3-cü Konfransının açılışında çıxış edərək bu ölkələrin inkişaf potensialına diqqət çəkib.

AzerVoice xəbər verir ki, Baş katib bildirib ki, LLDC ölkələrinin uğuru, 2030 Davamlı İnkişaf Gündəliyinin həyata keçirilməsi üçün həyati əhəmiyyət daşıyır. “Birlikdə dənizə çıxışı olmayan inkişaf etməkdə olan ölkələrin tarixində yeni bir səhifə aça bilərik”, – deyə Quterreş qeyd edib.

Quterreş konfrans iştirakçılarına müraciətində bildirib ki, coğrafi yerləşmə heç vaxt bir ölkənin taleyini müəyyən etməməlidir. Lakin Afrika, Asiya, Avropa və Cənubi Amerikada yerləşən 32 dənizə çıxışı olmayan ölkə üçün coğrafiya, inkişaf imkanlarını ciddi şəkildə məhdudlaşdırır və qeyri-bərabərliyi dərinləşdirir.

O əlavə edib ki, bu ölkələrin üçdə biri münaqişə, sabitsizlik və sosial-iqtisadi zəifliklərlə üz-üzədir. BMT-nin məlumatına görə, dünya əhalisinin təxminən 7 faizini təşkil edən LLDC ölkələri qlobal iqtisadiyyat və ticarətin cəmi 1 faizindən bir qədər artıq hissəsini əhatə edir. Bu da onların dünya iqtisadiyyatında kənarda qalmasının açıq göstəricisidir.