Bakı, AzerVoice

HƏMAS rəhbərliyinin təşkilatın yüksək vəzifəli üzvlərinə qarşı mümkün sui-qəsd təhlükəsi səbəbilə həyəcan və hazırlıq səviyyəsini artırdığı qeyd olunub.

AzerVoice xəbər verir ki, bu barədə İsrail mediası məlumat yayıb.

İddialara görə, İsrail HƏMAS-ın siyasi rəhbərliyinə qarşı hədəfli hücumlar planlaşdırır.

Fələstin rəsmiləri, HƏMAS-ın İsrailin yüksək rütbəli komandanlığa qarşı əməliyyatlar apara biləcəyindən ciddi narahatlıq keçirdiyini bildiriblər.

Məlumatda qeyd olunur ki, bu ehtimallar HƏMAS rəhbərliyi daxilində təhlükəsizlik tədbirlərinin gücləndirilməsinə səbəb olub. Eyni zamanda, hərəkat İsrail ordusunun Qəzza zolağında israilli əsirləri azad etmək məqsədilə hərbi əməliyyat həyata keçirə biləcəyindən də narahatdır.

İddiaları gücləndirən son açıqlamalardan biri də İsrailin energetika naziri Eli Koen tərəfindən səsləndirilib. Koen iyulun 26-da yerli mediaya verdiyi açıqlamada HƏMAS-a qarşı geniş fəaliyyət planlarının mövcud olduğunu və bu planların Qəzzada və onun hüdudlarından kənarda tətbiq edilə biləcəyini bildirib.

“HƏMAS-la əlaqəsi olan heç kim rahat yata bilməyəcək,” – deyə nazir sərt mesaj verib.

Xatırladaq ki, İsrail və HƏMAS arasında 2023-cü ilin oktyabrından bəri davam edən qarşıdurma nəticəsində 60 mindən çox fələstinli həyatını itirib, on minlərlə insan isə yaralanıb. Son dövrlərdə HƏMAS rəhbərliyinə qarşı xaricdə sui-qəsd ehtimallarının artması, bölgədə gərginliyi daha da yüksəldib.

İsrail tərəfi bu iddialara rəsmi cavab verməyib. HƏMAS isə hazırkı mərhələdə açıqlama verməkdən çəkinir.