BAKI, AzerVoice

ABŞ-ın tətbiq etdiyi 15 faizlik gömrük rüsumları Almaniya iqtisadiyyatına ciddi təsir göstərəcək.

AzerVoice xəbər verir ki, bu barədə Almaniya kansleri Fridrix Mers Berlində keçirdiyi mətbuat konfransında bildirib.

O, bu rüsumların Almaniyanın ixracyönlü iqtisadiyyatı üçün ciddi yük olduğunu etiraf etsə də, ABŞ ilə danışıqlarda bundan daha yaxşı nəticə əldə etməyin mümkün olmadığını vurğulayıb.

“Bu 15 faizlik rüsumlar və Avropa İttifaqından ABŞ-a ixrac olunan mallar üçün 0 faizlik rüsum – bu fərq açıq şəkildə Almaniya iqtisadiyyatı üçün ağır nəticələr doğuracaq. Bu nəticə bizi qane etməsə də, mövcud şərtlərdə əldə edilə biləcək ən yaxşı razılaşma idi” - deyə, kansler bildirib.

Mers həmçinin qeyd edib ki, bu ticarət siyasətinin nəticələrini yalnız Almaniya deyil, ABŞ da hiss edəcək.

“Şəxsən mən bu nəticədən artıq bir şey gözləmirdim. Amma yenə də deyirəm: bu nəticə bizim üçün qənaətbəxş deyil” – deyə, Mers vurğulayıb.

Xatırladaq ki, iyulun 27-də ABŞ prezidenti Donald Tramp Avropa Komissiyasının rəhbəri Ursula fon der Lyayenlə görüşdən sonra verdiyi açıqlamada bildirmişdi ki, ABŞ və Aİ 15 faizlik gömrük rüsumu barədə razılığa gəlib. Bu razılaşmaya əsasən, ABŞ Avropa mallarına 15 faizlik rüsum tətbiq edəcək, Aİ isə ABŞ məhsullarına rüsum qoymayacaq. Tramp bu razılaşmanı “tarixdəki ən böyük ticarət razılaşması” adlandırmışdı. Əvvəllər onun administrasiyası Aİ-dən idxal olunan bütün məhsullara 30 faizlik rüsum tətbiq etməyi planlaşdırırdı.