BAKI, AzerVoice
Papa XIV Leo Fələstin Prezidenti ilə Qəzza və İordan çayının qərb sahilindəki vəziyyəti müzakirə edib.
AzerVoice xəbər verir ki, Katolik kilsəsinin rəhbəri Papa XIV Leo Fələstin Prezidenti Mahmud Abbasla telefon danışığı zamanı Qəzza zolağında və İordan çayının qərb sahilində artan zorakılıq hallarını müzakirə edib.
Vatikan Mətbuat İdarəsinin yaydığı məlumata görə, Papa beynəlxalq humanitar hüquqa tam hörmət edilməsinə çağırışını bir daha təkrarlayıb. O, mülki əhalinin və müqəddəs yerlərin qorunmasının vacibliyini vurğulayaraq, ayrı-seçkilik olmadan güc tətbiqinin və məcburi köçkünlüyün beynəlxalq hüquqa zidd olduğunu qeyd edib.
Papa humanitar yardımın bölgəyə fasiləsiz çatdırılmasının və zorakılıqdan ən çox əziyyət çəkənlərə yardım göstərilməsinin vacibliyini diqqətə çatdırıb. Danışıq zamanı, həmçinin Vatikanla Fələstin arasında 2015-ci ildə imzalanan və 2016-cı ildə qüvvəyə minən ümumi müqavilənin onuncu ildönümü də qeyd olunub.
Qeyd edək ki, İsrail ordusunun 17 iyulda Qəzzadakı Müqəddəs Ailə Kilsəsinə hücumu nəticəsində 3 nəfər həlak olub. Hadisədən bir gün sonra, Papa XIV Leo İsrailin Baş naziri Binyamin Netanyahuya zəng edərək, ibadət yerləri ilə mülki şəxslərin qorunmasını və Qəzzada atəşkəsin təmin olunmasını tələb edib.
Papa XIV Leo bazar duası zamanı da Qəzzadakı katolik icmasına dəstəyini ifadə edərək, “Müharibənin vəhşiliyinə dərhal son verilməli, beynəlxalq hüquqa hörmət əsasında sülh yolu ilə həll yolları tapılmalıdır” - deyə bildirib.
Vatikanın dövlət katibi kardinal Pietro Parolin isə İsrailin kilsə hücumu ilə bağlı izahatlarını “qaneedici saymaq üçün əsas yoxdur” sözləri ilə şərh edib və bu addımı “səhv” adlandırıb.