BAKI, AzerVoice
Suveydadakı qarşıdurmalardan sonra giriş-çıxış ordunun nəzarətindədir.
AzerVoice xəbər verir ki, Suriyanın cənubundakı Suveydada druz və bədəvi ərəb qəbilələri arasında baş verən qarşıdurmalardan sonra atəşkəs əldə edilib. Suriya ordusu bölgəyə nəzarəti ələ keçirib və yardımlara davam edir. Qarşıdurmalarda Suriya ordusunun iki əsgəri həlak olub.
Toqquşmalar böyük ölçüdə dayanıb və ara-sıra kiçik miqyaslı toqquşmalar baş versə də, bölgədə ümumi atmosfer sakitdir. Xüsusən də bədəvi ərəb qəbilələrinin ərazidən çəkildiyi görünür. Girovların xilas edilməsi əməliyyatları hələ də davam edir.
Suriya ordusu Süveyda ətrafını nəzarətə götürüb. Druzlar mərkəzdə nəzarəti saxlasalar da, mülki vətəndaşların istəsələr şəhəri tərk etmələrinə icazə verilir. Bədəvi qəbilələrinin keçməsinə icazə verilmir. Suriya ordusu qəbilələrin nəzarətində olan əraziləri ələ keçirib.
Əraziyə ilkin tibbi yardım, tibbi ləvazimat və ərzaq yardımı çatdırılır. Bununla belə, druzların dini lideri Hikmət əl-Hicri və tərəfdarları bu yardımı çatdırmağa çalışan hökumət nümayəndə heyətlərinin daxil olmasını bəzən rədd edirlər. Bu arada, İsrail də Suveydaya havadan qida və tibbi ləvazimat daşıyıb.
Xatırladaq ki, 13 iyul tarixində Suriyanın Suveyda vilayətində ərəb qəbilələrinin döyüşçüləri ilə druz dəstələri arasında qarşıdurmalar baş verib. İyulun 15-də Suriya ordusu vilayətin inzibati mərkəzinə daxil olaraq, bölgədə sabitliyi təmin etmək üçün əməliyyatlara başlayıb. Ardınca İsrail, druz əhalisini qorumaq məqsədi ilə Suriyanın hərbi kolonlarını hədəfə almağa başladığını bəyan edərək hava hücumları həyata keçirməyə başlayıb.
16 iyul tarixində İsrail Hərbi Hava Qüvvələri Dəməşq və onun ətrafındakı bir sıra strateji obyektlərə, o cümlədən Suriya ordusunun Baş Qərargah kompleksinə, Əbu-Rummana rayonundakı Prezident Sarayına və paytaxtın qərbində yerləşən Mezze hərbi hava bazasına hava zərbələri endirib. Bu zərbələr nəticəsində Suriya təhlükəsizlik qüvvələrinin beş əməkdaşı həlak olub.
Məlumat üçün bildirək ki, druzlar – Suriya, Livan, İsrail və İordaniyada yaşayan, ərəb dilli və dini baxımdan özünəməxsus etnokonfessional qrupdur. Suriyada təxminən 700 min druz yaşayır ki, bu da kürdlər və ələvilərdən sonra ölkədəki üçüncü ən böyük dini-etnik azlıqdır.