BAKI, AzerVoice

ABŞ prezidenti Donald Trampın administrasiyası İsrailə müraciət edərək Suriyaya ərazisinə hərbi hava zərbələrini dayandırmağı xahiş edib.

AzerVoice xəbər verir ki, bu barədə “Axios” portalı amerikalı rəsmilərə istinadən məlumat verib.

“İyulun 16-da Tramp administrasiyası İsrailə yenidən müraciət edərək Suriyaya qarşı hücumları dayandırmağı və gərginliyin azaldılması məqsədilə Dəməşq hakimiyyəti ilə dialoqa başlamağı tövsiyə edib” – deyə, məlumatda bildirilib.

Xatırladaq ki, bir qədər əvvəl İsrail ordusu Dəməşqdə Suriya Baş Qərargah binasına zərbə endirdiyini açıqlamışdı. Bundan əvvəl isə İsrailin müdafiə naziri İsrael Kats xəbərdarlıq etmişdi ki, əgər Suriya hakimiyyəti cənubdakı Əs-Süveyda şəhərindən qoşunlarını geri çəkməsə, İsrail bu ölkəyə qarşı hücumlarını davam etdirəcək.

Qeyd edək ki, İsrail hökuməti ötən ilin sonlarında Dəməşqdə hakimiyyətin dəyişməsindən sonra dəfələrlə Suriyada yaşayan druzların müdafiəsini dəstəklədiyini ifadə edib və lazım gəldikdə onlara özünümüdafiə məqsədilə yardım göstərməyə hazır olduğunu bəyan edib.

Məlumat üçün bildirək ki, druzlar – Suriya, Livan, İsrail və İordaniyada yaşayan, ərəb dilli və dini baxımdan özünəməxsus etnokonfessional qrupdur. Suriyada təxminən 700 min druz yaşayır ki, bu da kürdlər və ələvilərdən sonra ölkədəki üçüncü ən böyük dini-etnik azlıqdır.