BAKI, AzerVoice

Almaniyanın müdafiə naziri Boris Pistorius ABŞ-ın müdafiə naziri, Pentaqon rəhbəri Pit Heqsetlə bu gün Vaşinqtonda görüşəcəyini bildirib.

AzerVoice xəbər verir ki, bu barədə "Financial Times" nəşri məlumat yayıb.

Görüşdə ABŞ-ın Avropanın təhlükəsizliyinə dəstək üzrə “yol xəritəsi” və Ukrayna ordusu üçün "Patriot" hava hücumundan müdafiə (HHM) sistemlərinin alınması məsələləri müzakirə olunacaq.

Pistoriusun sözlərinə görə, Vaşinqton əvvəllər Kiyevə Patriot sistemlərinin tədarükünü dayandırıb. Berlin isə artıq Ukraynaya bu sistemdən üç ədədini öz ehtiyatlarından verib və əlavə tədarük imkanına malik deyil. Nazir iyulun 13-də verdiyi açıqlamada, bunun səbəbinin Almaniyanın silah təminatı sahəsində yaşadığı problemlərlə bağlı olduğunu vurğulayıb.

Pistoriusun rəhbərlik etdiyi nazirlik hazırda Almaniya üçün 2030-cu illərə qədər tanklar, sualtı qayıqlar, pilotsuz uçuş aparatları (PUA) və qırıcı təyyarələr daxil olmaqla müxtəlif silahların alınmasını nəzərdə tutan genişmiqyaslı satınalma planı üzərində işləyir.

“Keçmişdə biz yalnız əlimizdəki silahlar tam tükəndikdə və ya sıradan çıxdıqda onları əvəzləməyə çalışırdıq” – deyə, nazir bildirib. O, silah istehsalçılarını tənqid edərək qeyd edib ki, “onlar artıq şikayət etmək əvəzinə nəticə göstərməlidirlər”. Pistorius əlavə edib ki, müdafiə sənayesində layihələrin icrası ilə bağlı hələ də gecikmələr var və istehsal gücləri artırılmalıdır.

"Die Sueddeutsche Zeitung" qəzetinin məlumatına görə, Almaniya son həftələr ABŞ-dan Ukrayna üçün azı bir "Patriot" sistemi almağa çalışır. Lakin ABŞ prezidenti Donald Tramp hələ bu barədə heç bir öhdəlik götürməyib. Əksinə, o, Berlini özündə olan doqquz "Patriot" sistemindən birini Kiyevə verməyə razı salmağa çalışır.