BAKI, AzerVoice

ABŞ Prezidenti Donald Tramp, Vyetnam Kommunist Partiyası Mərkəzi Komitəsinin Baş katibi To Lam ilə telefon danışığı zamanı Birləşmiş Ştatların vyetnam məhsullarına tətbiq edilən gömrük rüsumlarını azaldacağını bildirib.

AzerVoice xəbər verir ki, bu barədə Vyetnamın Rəsmi İnformasiya Agentliyi (VNA) məlumat yayıb.

Məlumata görə, tərəflər Vyetnam-ABŞ münasibətləri və qarşılıqlı ticarət tarifləri üzrə razılaşma əldə olunması istiqamətində aparılan danışıqları müzakirə ediblər. Hər iki lider, ölkələrin nümayəndə heyətlərinin ədalətli və balanslaşdırılmış ticarət razılaşması üzrə ortaq bəyannaməni razılaşdırmasını müsbət hal kimi dəyərləndirib.

Tramp bəyan edib ki, ABŞ bir çox vyetnam məhsullarının idxal tariflərini əhəmiyyətli dərəcədə azaldacaq və iki ölkə arasında ticarət münasibətlərinə təsir edən məsələlər, xüsusilə hər iki tərəf üçün prioritet olan sahələrdə əməkdaşlığı davam etdirəcək. Vyetnam tərəfi isə ABŞ-ı ölkəni rəsmi şəkildə bazar iqtisadiyyatı olan dövlət kimi tanımağa və bəzi yüksək texnoloji malların ixracına qoyulan məhdudiyyətləri aradan qaldırmağa çağırıb.

İki ölkənin rəhbərləri, qarşıdakı illərdə Vyetnam və ABŞ arasında hərtərəfli strateji tərəfdaşlığın inkişafı istiqamətində əsas istiqamətləri və tədbirləri müzakirə ediblər. Onlar nümayəndə heyətləri arasında təmasların genişlənməsini və iqtisadiyyat, ticarət və investisiya sahələrində, xüsusilə elm və yüksək texnologiyalar kimi əsas və innovativ sahələrdə əməkdaşlığın gücləndirilməsini yüksək qiymətləndiriblər.