BAKI, AzerVoice
İsrailin İrana hücumlarında həyatını itirənlər arasında 49 qadın və 13 uşağın olduğu bildirilib.
AzerVoice xəbər verir ki, İran dövlət televiziyasının məlumatına görə, iyunun 13-də İsrailin İrana qarşı başlatdığı hücumlarda 627 nəfər həyatını itirib.
Həyatını itirənlər arasında 49 qadın və 13 uşaq var ki, onlardan ən kiçiyi 2 aylıq körpədir.
Digər tərəfdən, İsrail ölkənin müxtəlif şəhərlərində 7 xəstəxana və 11 təcili yardım maşınını birbaşa hədəfə alıb. Bu hücumlarda 5 tibb işçisinin həyatını itirdiyi bildirilib.
Xatırladaq ki, 13 iyun səhər saatlarında İsrail İrana hərbi hava zərbələr endirib. Zərbələr nəticəsində çoxlu sayda yüksək səviyyəli hərbçi, generallar, nüvə alimləri və başqa yüksək səviyyəli rəsmilər ölüb.
Elə həmin günün axşamı, İran “Doğru Vəd III” əməliyyatı ilə İsrailə cavab verib: Tel-Əviv daxil olmaqla bir çox yerlərə yüzlərlə ballistik raket, pilotsuz uçuş aparatı buraxılıb, bu da mülki itkilərə və geniş-miqyaslı dağıntılara yol açıb.
Xatırladaq ki, 22 iyunda ABŞ İranın üç nüvə obyektinə hərbi hava hücumları edib. Hava hücumları nəticəsində İranın nüvə obyektlərinin məhv edildiyi qeyd olunub.
Əlavə edək ki, 23 iyun axşam saatlarında İran ABŞ-nin Qətərdəki hərbi bazasına hava zərbələri endirib.
Bu gün İsrail baş nazirinin ofisi İsrail hökumətinin ABŞ prezidenti Donald Trampın vasitəçiliyi ilə İranla atəşkəsə razılaşdığını elan edib.
İranın Ali Milli Təhlükəsizlik Şurası da bəyanat yayaraq hücumların dayandırıldığını qeyd edib.