BAKI,VOA, Nailə Babazadə
Səudiyyə Press Agentliyinin məlumatına görə, şənbə günü Səudiyyə Ərəbistanı Küveytin mühüm obyektlərini hədəf alan hücumları qətiyyətlə pisləyib. Krallıq gərginliyin artmasında İranı, onun proksi qüvvələrini və əlaqəli qrupları günahlandırıb.
VOA xəbər verir ki, Küveyt Xarici İşlər Nazirliyi cümə axşamı gecəsi ölkənin həyati əhəmiyyətli obyektlərinə İran və onun proksi qüvvələri tərəfindən həyata keçirilən pilotsuz uçuş aparatı (PUA) hücumlarını pisləyib. Nazirlik bu zərbələri ölkənin suverenliyinin və hava məkanının pozulması kimi qiymətləndirib.
Krallığın Xarici İşlər Nazirliyi yaydığı bəyanatda hücumları ən kəskin ifadələrlə lənətləyib, onları "iyrənc" və Küveytin suverenliyinin açıq-aşkar pozulması adlandırıb.
Səudiyyə Ərəbistanı bu hücumların beynəlxalq hüququn və BMT Nizamnaməsinin kobud şəkildə pozulması olduğunu bildirərək, onların regional təhlükəsizlik və sabitliyə birbaşa təhdid yaratdığı barədə xəbərdarlıq edib.
Krallıq bu növ hərəkətləri qəti şəkildə rədd etdiyini bir daha vurğulayıb, hərbi əməliyyatların dərhal dayandırılmasına çağırıb və bütün tərəfləri müvafiq beynəlxalq qanun və konvensiyalara əməl etməyə səsləyib.
Bəyanatda, həmçinin İran və onun proksi qüvvələrinin ərəb və islam ölkələrini hədəf alan bütün düşmənçilik fəaliyyətlərinə son qoymasının zəruriliyi vurğulanıb. BMT Təhlükəsizlik Şurasının 2026-cı il tarixli 2817 nömrəli qətnaməsinin icrasının vacibliyi qeyd olunub.
Riyad Küveyt hökuməti və xalqı ilə tam həmrəy olduğunu bir daha təsdiqləyib və Körfəz ölkəsinin öz suverenliyini, təhlükəsizliyini və sabitliyini qorumaq üçün atdığı bütün addımları dəstəklədiyini ifadə edib.