BAKI,AzerVoice

ABŞ Müdafiə Nazirliyinin (Pentaqon) kəşfiyyat hesabatına əsasən, ötən həftəsonu İranın üç nüvə obyektinə endirilən hava zərbələri, İranın nüvə proqramının əsas infrastrukturunu tamamilə məhv etməyib, sadəcə onu bir neçə ay geriyə atıb.

AzerVoice xəbər verir ki, məsələ ilə tanış üç mənbə, ABŞ kəşfiyyatının ilkin qiymətləndirməsinə əsaslanaraq bildirib ki, zərbələr nüvə proqramının əsas komponentlərini sıradan çıxarmayıb.

Hesabat Pentaqonun Müdafiə Kəşfiyyat Agentliyi (DIA) tərəfindən hazırlanıb və ilkin nəticələrə əsaslanaraq, hücumların İranın uran zənginləşdirmə qabiliyyətinə maksimum altı ay gecikmə yaratdığı vurğulanıb.

Mənbələr qeyd edib ki, İranın zənginləşdirilmiş uran ehtiyatı məhv edilməyib və santrifuqalar əsasən "sağlam" qalıb.

Beş səhifəlik ilkin hesabatda həmçinin qeyd olunur ki, hücumlardan öncə İran zənginləşdirilmiş uran ehtiyatlarının böyük hissəsini daha təhlükəsiz, gizli nüvə obyektlərinə köçürə bilib.

Mənbələr bildirirlər ki, bu dəyərləndirmə hələ ilkin mərhələdədir və gələcəkdə yeni məlumatlarla dəyişə bilər.

Ağ Ev isə hesabatın mövcudluğunu təsdiqləsə də, onun nəticələri ilə razılaşmadığını bildirib. Ağ Evin mətbuat katibi Karoline Leavitt bu qiymətləndirmənin "tamamilə səhv" olduğunu və onun sızdırılmasının məqsədli şəkildə Prezident Donald Trampı nüfuzdan salmağa yönəldiyini deyib.

Xatırladaq ki, ABŞ Prezidenti Donald Tramp 21 iyun tarixində B-2 strateji bombardmançı təyyarələrinin İranın Fordo, Natanz və İsfahan şəhərlərindəki nüvə obyektlərinə hava hücumu endirdiyini bəyan edib və bu zərbələrin İranın nüvə infrastrukturunu “tamamilə və kökündən məhv etdiyini” iddia edib.