BAKI, AzerVoice

ABŞ vitse-prezidenti Cey Di Vens, İlon Maskın ABŞ prezidenti Donald Trampı hədəf alaraq böyük bir səhvə yol verdiyini bildirib.

AzerVoice-un məlumatına görə, bu barədə Vens yerli televiziyaya verdiyi müsahibə zamanı bildirib.

ABŞ vitse-prezidenti, Mask ilə Tramp arasında qarşıdurmadan sonra Maskın sərt hücumlarını (paylaşımlarını) "emosional bir adamın" yaşadığı sıxıntılar kimi qiymətləndirərək, bu hücumların həddindən artıq olduğunu vurğulayıb.

"Ümid edirəm ki, Mask yenidən öz mövqeyinə dönər. İndi bu mümkün görünməyə bilər. Düşünürəm ki, əgər İlon bir az sakitləşərsə, hər şey yaxşı olacaq" - deyə, Vens bildirib.

Xatırladaq ki, çərşənbə axşamı günü, Tramp və Mask arasında siyasi ittifaq çökdü, çünki Tramp, Maskın, Konqresdə qəbul edilməyə çalışılan nəhəng büdcə qanunu layihəsinə qarşı çıxış etməsindən sonra, milyarderi hökumətlə bağlanmış böyük müqavilələrdən məhrum etməklə hədələdi.

Daha sonra Tramp, Ağ Ev ofisində mətbuata verdiyi açıqlamada, çox məyus olduğunu bildirib və əlavə edib ki, keçmiş köməkçisi və onun əsas maliyyə dəstəkçilərindən biri olan Mask, Konqresdə müzakirə olunan büdcə qanununu tənqid edib. ABŞ prezidenti bu layihəni "böyük və gözəl" adlandırarkən, Mask onu "iyrənc" adlandırıb.