BAKI, AzerVoice
Fransada uşaqların olduğu açıq ərazilərdə siqaret çəkməyə qadağa qoyulur.
AzerVoice xəbər verir ki, Fransanın
səhiyyə naziri Ketrin Votrin iyulun 1-dən etibarən uşaqların olduğu
açıq məkanlarda siqaret çəkmənin qadağan ediləcəyini açıqlayıb.
Bu qərar parklar, bağçalar, çimərliklər, avtobus dayanacaqları və
məktəb ərazilərini əhatə edir.
Nazir "Ouest-France" qəzetinə verdiyi açıqlamada, qadağaya əməl etməyən şəxslərin 135 avro cərimə olunacağını bildirib. O, "Uşaqların təmiz hava alma haqqı siqaret çəkmə azadlığından önəmlidir" deyərək bu addımın uşaqları passiv siqaretin zərərindən qorumağa yönəldiyini vurğulayıb.
Qanun layihəsinə əsasən, qadağa məktəb əraziləri ilə yanaşı, orta məktəb və liseylərin qarşısında da tətbiq ediləcək. Məqsəd şagirdlər arasında siqaret çəkmənin qarşısını almaqdır.
Qeyd edək ki, yeni qaydalar kafe və restoranların açıq hava sahələrinə şamil olunmayacaq. Həmçinin, elektron siqaretin istifadəsi bu mərhələdə qadağaya daxil edilmir.