BAKI, AzerVoice
Romanın mərkəzində Fələstinlə həmrəylik aksiyası keçirilib
AzerVoice xəbər verir ki, İtaliyanın
paytaxtı Romada İsrailin Qəzza zolağında həyata keçirdiyi hücumlara
və bölgədəki humanitar böhrana etiraz olaraq genişmiqyaslı
həmrəylik aksiyası təşkil edilib.
Aksiya iştirakçıları İtaliya Parlamentinin qarşısında, Montecitorio
Dikilitaşının yerləşdiyi meydanda nəhəng Fələstin bayrağı açaraq
Qəzzadakı vəziyyətə diqqət çəkiblər.
Etirazçılar Fələstin bayraqları dalğalandırıb, atəşkəsə çağıran şüarların yazıldığı pankartlar qaldıraraq bölgəyə qarşı tətbiq edilən blokadanın və zorakılığın dayandırılmasını tələb ediblər. Onlar səssiz beynəlxalq ictimaiyyətin fonunda Fələstinin səsi olmağa çalışdıqlarını bildiriblər.
Qeyd edək ki, Qəzzada davam edən müharibə səbəbilə minlərlə insan həyatını itirib, bölgədə dərin humanitar fəlakət yaşanır. Dünya üzrə bir çox ölkədə olduğu kimi, İtaliyada da bu vəziyyətə qarşı ictimai narahatlıq artmaqdadır.