Bakı, AzerVoice
Şimali Kipr Türk Cümhuriyyəti Xarici İşlər Nazirliyi ABŞ ilə Cənubi Kipr Rum Administrasiyası arasında imzalanan razılaşmaya münasibət bildirib.
AzerVoice xəbər verir ki, KKTC Xarici İşlər Nazirliyi ABŞ ilə Cənubi Kipr arasında sentyabrın 10-da imzalanan “İkitərəfli müdafiə əməkdaşlığı üzrə yol xəritəsi” ilə bağlı yazılı açıqlama verib.
Açıqlamada ABŞ-ın son günlər Rum tərəfinə artan dəstəyinə diqqət çəkilib. Həmçinin ABŞ hərbi gəmilərinin Cənubi Kiprə etdiyi liman səfərlərindən və Cənubi Kiprə qarşı tətbiq edilən silah embarqosunun ləğv edilməsindən danışılıb.
Sözügedən dəstəyin Şərqi Aralıq dənizi bölgəsində tarazlığı pozacaq nəticələrə gətirib çıxaracağı ifadə edilib.
Açıqlamada, KKTC-nin bölgədə baş verə biləcək hər hansı təhlükəyə qarşı hər zaman hazır olduğu vurğulanıb. Həmçinin Kiprdəki Türk xalqı təhlükə ilə qarşılaşacağı təqdirdə Türkiyə ilə birlikdə addım atılacağı bildirilib.
Qeyd edək ki, ABŞ Müdafiə Nazirliyindən (Pentaqon) verilən açıqlamada, Avropa və Şərqi Aralıq dənizinin təhlükəsizliyinin ABŞ və Cənubi Kipr Rum Administrasiyası üçün "həyati əhəmiyyət" daşıdığına diqqət çəkilib.
