Bakı,  AzerVoice

İsrail İordan çayının qərb sahilinində yerləşən Cenin şəhərində hərbi əməliyyatları dayandırıb.

AzerVoice xəbər verir ki, bu barədə Fələstinin WAFA xəbər agentliyi məlumat yayıb.

Agentlik İsrailin Ceninə hücumunda uşaqlar və qocalar da daxil olmaqla 21 nəfərin həlak olduğunu, çoxlsaylı şəxsin yaralandığını bildirib.

WAFA İsrailin Ceninə son hücumunu 2002-ci ildən bəri edilən ən qanlı hücum olaraq xarakterizə edib.

İsrail tərəfi WAFA agentliyinin yaydığı xəbəri təsdiqləməyib. Bölgədə əməliyyatların bitmədiyini, davam edəcəyini bildirib.

İsrail ordusu həmçinin Cenində 14 yaraqlının zərərsizləşdirildiyini və 30-dan çox şübhəlinin həbs edildiyini açıqlayıb.

Fələstin KİV İsrail ordusunun İordan çayının qərb sahilində yerləşən Tulkerim şəhərindən də geri çəkildiyini bildirib.

Həmçinin İsrailin Nablusa hücumlarında dünən gecə (cümə) 13 yaşlı qız dünyasını dəyişib. Azyaşlı qızın sinəsindən aldığı güllə zərbəsi nəticəsində öldüyü bildirilir.

Qızın atası övladının “bacıları ilə evdə olarkən həqiqi güllələrlə vurulduğunu” bildirib.

Ramallahdakı Fələstin Səhiyyə Nazirliyi qızın İsrail əsgərləri tərəfindən öldürüldüyünü deyib. İsrail ordusu isə hadisə ilə bağlı araşdırma apardığını bildirib.

Qeyd edək İsrailin oktyabrın 7-dən başlayan hücumları nəticəsində 40 mindən çox insan həlak olub yüz minlərlə insan yaralanıb əhalinin böyük bir qismi köçmək məcburiyyətində qalıb.