Bakı, VOA

İranda prezidentlik uğrunda mübarizə aparan altı namizəd televiziyada apardıqları debat zamanı Türkiyə və İran iqtisadiyyatlarını müqayisə edərək müzakirə aparıblar.

VOA xəbər verir ki, keçən ay İbrahim Rəisinin helikopter qəzasında həlak olmasından sonra erkən seçki prosesinə sürətlə daxil olan İranda namizədlər ötən axşam dövlət televiziyasında yayımlanan iqtisadiyyat mövzulu debatın birinci raundunda dünya ilə əlaqələr və sanksiyalar müzakirə ediblər.

Debatda mühafizəkar (rejim tərəfdarı) namizədlərdən Muhamməd Baqir Qalibaf, Səid Cəlili, Əmir Huseyin Qadızadəhaşimi və Əli Rıza Zəqani, mötədil mühafizəkar Mustafa Purmuhammədi və islahatçıların yeganə namizədi Məsud Pəzəşkiyan iştirak edib.

Mühafizəkar Zəkani İran iqtisadiyyatı ilə bağlı fikirlərini müdafiə etmək üçün Türkiyədəki inflyasiyanı misal çəkərək, “Türkiyə dünya ilə əlaqə qursa da, uğursuzluğa düçar oldu” deyib.

İslahatçı Pəzəşkian isə cavabında, "Zəhmət olmasa gedin və bu qədər inflyasiyaya baxmayaraq, oradakı yollara, mağazalara, ixracata baxın. İranın yollarına da baxın. İnqilabdan əvvəl İranın yollarına Türkiyə qibtə ilə baxırdı. İndi yüzlərlə kilometr yol və 70-80 tunel tikiblər. Biz isə dörd tunel tikəndə öyünürük. Geridə qalmışıq” deyə qeyd edib.

Onu da qeyd edək ki, İranda prezident seçkiləri iyunun 28-də keçiriləcək.

Yuxarıdakı adlar soldan sağa Muhamməd Baqir Qalibaf, Əli Rıza Zaqani, Mustafa Purmuhammədi; Aşağıdakı adlar soldan sağa Səid Cəlili, Mir Huseyin Qadızadəhaşimi və Məsud Pəzəşkiyandır.