Bakı. AzerVoice:
Yaponiyada may ayında korporativ iflasların əvvəlki ilin eyni dövrü ilə müqayisədə 42,9 faiz artdığı bildirilib.
AzerVoice xəbər verir ki, kredit araşdırma şirkəti Tokyo Shoko Research aylıq olaraq iflas xəbəri verən korporativ şirkətlərin son vəziyyətini araşdırıb.
Araşdırmaya əsasən, Yaponiyada may ayında iflas edən korporativ şirkətlərin sayı əvvəlki ilə görə 42,9% artaraq 1009-a çatıb.
Müvafiq olaraq, Yaponiyada son 11 ildə ilk dəfə olaraq aylıq müflisləşən korporativ şirkətlərin sayı 1000-i keçib.
İncələnilən on sektor arasında ən çox iflas 327 şirkətlə xidmət sektorunda müşahidə edilib. İkinci yerdə 193 şirkətlə tikinti sektoru qərarlaşıb.
Xarici valyuta qarşısında dəyər itirən Yapon Yeninin xammal və enerji xərclərini artırdığı və bunun şirkətlər üçün “ödənilə bilməyən xərclər” yaratdığı vurğulanıb.
Bildirilib ki, iflas edən şirkətlərin sayının təxminən dörddə üçünün 100 milyon yendən (637 min dollar) aşağı borcları var.
Müflisləşmənin səbəbləri ilə bağlı araşdırmada, "Yapon yeninin ucuzlaşması, inflyasiya və Covid-19 ilə əlaqəli dəstəyin sona çatması səbəbindən işçi qüvvəsinin azalması bizneslər üzərində təziq yaradır” ifadə edilib.
Araşdırmada iflasların sayının artmasının gözlənildiyi qeyd edilib və bəzi şirkətlərin mənfəətini açıqlasa da, işlərindəki bərpa prosesinin gecikmələr səbəbindən maliyyə çətinliyi yaşayacaqları vurğulanıb.
