BAKI, AzerVoice

Fransa prezidenti Emmanuel Makron ABŞ-ın tətbiq etdiyi yeni gömrük rüsumlarına qarşı görüləcək cavab tədbirləri və Ukraynadakı vəziyyətlə bağlı Böyük Britaniyanın baş naziri Kir Starmerlə müzakirələr aparıb.

AzerVoice xəbər verir ki, bu barədə Makron X platformasında etdiyi paylaşımda bildirib.

"ABŞ-ın gömrük rüsumlarının dünya iqtisadiyyatına vurduğu zərbə fonunda, biz prezident Donald Trampla keçiriləcək danışıqlar zamanı mövqelərimizi sıx şəkildə koordinasiya etməyə hazır olduğumuzu təsdiqlədik. Ticarət müharibəsi heç bir tərəfin maraqlarına uyğun deyil", - deyə Makron qeyd edib.

Makronun sözlərinə görə, söhbət zamanı Ukraynaya dəstək məsələsi də müzakirə olunub.

"Biz Ukrayna xalqına uzunmüddətli yardım barədə düşünməyə davam edirik. Əsas diqqət isə ön cəbhədə dayanan Ukrayna ordusuna dəstək verməkdə olacaq", - deyə Makron bildirib.

Xatırladaq ki, Tramp aprelin 2-də 185 ölkəyə aid məhsullara gömrük rüsumları tətbiq edəcəyini açıqlayıb. O, idxal olunan mallara minimum 10% rüsum tətbiq ediləcəyini bildirib. Ayrı-ayrı ölkələr üçün fərdi tariflər müəyyən olunub.