BAKI, AzerVoice

ABŞ prezidenti Donald Tramp ölkənin yeni immiqrasiya proqramını elan edərək, "Qızıl Kart" adlanan xüsusi yaşayış icazəsinin 5 milyon dollara satışa çıxarılacağını bildirib.

AzerVoice xəbər verir ki ,Tramp Oval Ofisdə jurnalistlərə açıqlamasında bu qərarı izah edib.

"Biz qızıl kart satacağıq. Yaşıl kart var, amma bu qızıl kartdır. Onun dəyəri təxminən 5 milyon dollar olacaq. Bu kart vasitəsilə ABŞ-a zəngin və uğurlu insanlar gələcək. Onlar çox pul xərcləyəcək, yüksək məbləğdə vergi ödəyəcək və yeni iş yerləri yaradacaqlar." - deyə o bildirib.

Rusiyanın Ukraynaya hücumundan sonra ABŞ tərəfindən sanksiyalara məruz qalan rus oliqarxlarının da bu karta müraciət edə biləcəyi ehtimal edilir. Tramp bu məsələyə toxunaraq, "Mən çox yaxşı insanlar olan bəzi rus oliqarxlarını tanıyıram. Onlar bu icazəni almaq üçün uyğun ola bilərlər", – deyə bildirib.

Əslində, sərmayə qarşılığında yaşayış icazəsi almaq ABŞ üçün yeni bir təcrübə deyil. Hazırda ölkədə EB-5 adlı oxşar proqram mövcuddur. Lakin ABŞ-ın Ticarət Naziri Hovard Lutnik bu proqramın geniş fırıldaqçılıq hallarına yol açdığını və "ucuz yaşıl kart almağın bir üsulu" olduğunu vurğulayıb. O, EB-5-in ləğv ediləcəyini və onun əvəzinə Trump Qızıl Kartının tətbiq olunacağını açıqlayıb.

Trampın sözlərinə görə, yeni proqram təkcə fərdlər üçün deyil, həm də böyük şirkətlər üçün nəzərdə tutulub. O bildirib ki, Apple və digər böyük şirkətlər işçilərini ABŞ-a gətirmək üçün Qızıl Kart ala biləcəklər.

Respublikaçı milyarder vurğulayıb ki, bu kart sahibləri ABŞ vətəndaşı olmayacaq, lakin ölkədə yaşayaraq vergi ödəyəcəklər. Tramp hesab edir ki, ABŞ hökuməti bir milyon və ya daha çox Qızıl Kart sata bilər ki, bu da ölkə iqtisadiyyatı üçün böyük gəlir gətirəcək.