Bakı, AzerVoice

ABŞ Rusiya ilə müharibə zamanı Ukraynaya göstərdiyi milyardlarla dollarlıq dəstəyin qarşılığını almağa layiqdir.

AzerVoice xəbər verir ki, ABŞ-ın milli təhlükəsizlik müşaviri Mike Waltz bu fikirləri səsləndirib.

O vurğulayıb ki, ABŞ uzun illərdir Ukraynaya edilən yardımların əvəzini gözləməkdə haqlıdır.

Milli təhlükəsizlik müşaviri Ukrayna prezidenti Vladimir Zelenskinin nadir torpaq elementlərinin yarısını ABŞ-a təhvil verməsini nəzərdə tutan razılaşmanı qəbul etməsinin çox ağıllı addım olacağını bildirib.

ABŞ prezidenti Donald Trampın bu məsələyə xüsusi diqqət yetirdiyini qeyd edən Waltz , “Trampla əməkdaşlıq etmək Ukrayna üçün ən yaxşı təminatdır.” - deyə bildirib.

ABŞ mediasının yaydığı məlumata görə, Zelenski, Vaşinqtonun israrına baxmayaraq, nadir torpaq elementlərinin yarısının ABŞ-a verilməsini nəzərdə tutan sazişi imzalamaqdan imtina edib.

Xatırladaq ki, Fevralın 3-də Tramp ABŞ-ın Ukraynadan nadir torpaq elementləri almaq niyyətində olduğunu açıqlamışdı. O, Ukraynadakı müharibənin tezliklə başa çatmalı olduğunu vurğulayaraq, ABŞ-ın bu ölkəyə yardımlarının qarşılıqsız olmamalı olduğunu bildirmişdi.

Zelenski isə Ukraynanın mineral ehtiyatlarına sərmayə yatırmaq istəyən müttəfiqlərə açıq olduğunu bəyan edib.