Bakı. AzerVoice:

İsrail-Fələstin münaqişəsi uzun müddətdir ki, davam edir. Bu məsələnin həlli üçün bir sıra alternativ planlar irəli sürülsə də prosesə heç bir müsbət təsiri olmayıb. Qərb ölkələri isə ümumiyyətlə münaqişəyə “barmaq arasından” baxır. Avropanın sadəcə 3 dövləti – İspaniya, İrlandiya, Norveç – Fələstini dövlət kimi tanıyıb. Münaqişə hələ də davam etdiyinə görə deyə bilərik ki, üç Avropa dövlətinin Fələstini tanımasının heç bir təsiri olmadı. Digər Avropa dövlətləri də Fələstini tanıyacaqlarını bildirsələr də hələ də real addım atılmayıb. Bəs digər Avropa dövlətlərinin Fələstini tanıması prosesə necə təsir edə bilər? İsrail və ABŞ-nin məsələyə münasibəti necə olar?

AzerVoice xəbər verir ki, mövzu ilə bağlı politoloq Rufiz Hafizoğlu Crossmedia.az-a açıqlama verib:

“Hər şeydən öncə qeyd etmək istəyirəm ki, Fələstin dövləti gec-tez tanınacaq. İsrailin bu dövləti məhv etməsi cəhdlərinə baxmayaraq Fələstin dövlətinin tanınması şərtdir. Bu məsələ ilə bağlı müxtəlif yanaşmalar var. Amma unudulan bir nüans var. Bu gün Azərbaycanın özü belə Fələstin dövlətinin tanınması üçün təsis edilən İslam Əməkdaşlıq Təşkilatının (İƏT) üzvüdür. Və qeyd etmək lazımdır ki, Azərbaycan burda çox aktiv üzvdür. Fələstini dövlət kimi Birləşmiş Millətlər Təşkilatının (BMT) ortalama 70%-i tanıyıb. Qərb ölkələrinin əksəriyyəti hələ də tanımır. Lakin baş verən hadisələr onunla yekunlaşacaq ki, bütün Avropa dövlətləri Fələstini dövlət kimi tanıyacaqlar”.

Politoloq qeyd edib ki, Fələstinin Avropa dövlətləri tərəfindən tanınması İsrail-Fələstin münaqişəsinə heç bir təsir göstərməyəcək:

“Avropa dövlətlərinin Fələstini bir dövlət kimi tanıması İsrail-Fələstin münaqişəsinə təsir etməyəcək. Acı reallığı qəbul etməliyik ki, Fələstin dövlətinin tanınması hələ bölgədə problemin həll olması demək deyil. Çünki Fələstin dövlətinin tanınması 1967-ci il sərhədləri daxilində baş verməlidir. Yəni İsrail 1967-ci ildən bəri işğal etdiyi bütün torpaqları qaytarmalı, inşa etdiyi qeyri-qanuni tikililəri sökməlidir. Digər tərəfdən isə Fələstin və “Fəth” təşkilatı arasında bir uzlaşma olmalıdır. Dolayısı ilə deyə bilərik ki, Fələstin dövlətinin qarşısını kəsən yeganə qüvvə İsraildir və onun da ABŞ kimi böyük havadarı var. Bu gün İsrail höküməti HƏMAS-ı təhlükə kimi dünyaya çatdırmağa çalışsa da bölgədə yeganə təhlükəli dövlət İsraildir. İranla problemi var, Suriyaya davamlı hücumlar təşkil edir, Yəməndə husilərlə savaşır. Açıq şəkildə görünür ki, bölgədə sülhə yeganə əngəl İsrail dövlətidir. Fələstin dövlətinin tanınması çox uzun və çətin proses olacaq. Çünki ortada İsrail, ABŞ və Fələstin daxili qarşıdurmalar var”.