BAKI,AzerVoice

Azərbaycan və Gürcüstan arasındakı tarixi və mədəni əlaqələr əsrlər boyu xalqlarımızı bir-birinə bağlamış, iki ölkəni strateji tərəfdaşlığa doğru aparıb. Prezident İlham Əliyevin yürütdüyü uğurlu xarici siyasət və mehriban qonşuluq prinsipləri iki ölkə arasında əlaqələrin müxtəlif sferalarda sürətli inkişafına əsas yön verən amildir. Prezident İlham Əliyevin Gürcüstanın Prezidenti Mixeil Kavelaşvilinin aprelin 16-da Azərbaycana səfəri zamanı mətbuata verdiyi bəyanatlar da ikitərəfli inkişaf səviyyəsini bir daha göstərir.

Bunu AzerVoice-ə açıqlamasında Milli Məclisin deputatı Sevil Mikayılova deyib.

Onun sözlərinə görə, müasir dövrdə bu münasibətlər regionun iqtisadi, nəqliyyat və enerji xəritəsini yenidən tərtib edən, beynəlxalq əməkdaşlıq üçün nümunə göstərilən dinamik inkişaf mərhələsindədir:

"Xalqlarımız qonşuluq və ortaq tarix sayəsində sülh, mehribanlıq və qardaşlıq ənənələrini qoruyub saxlayır. Bu ənənələr müasir zamanda da siyasət və cəmiyyətlərarası münasibətlərə mühüm təsir göstərir, hökumətlər səviyyəsində yüksək etimada əsaslanan dialoqun formalaşmasına təkan verir".

Deputat bildirib ki, Prezident İlham Əliyevin və Prezident Mixeil Kavelaşvilinin qarşılıqlı rəsmi və işgüzar səfərləri siyasi dialoqu gücləndirir:

“Xarici işlər nazirlərinin və hökumətlərarası komissiyaların fəaliyyəti ikitərəfli gündəmin müxtəlif sahələr üzrə davamlı müzakirəsinə şərait yaradır. Hər iki ölkə Cənubi Qafqazda sülhün, təhlükəsizliyin və əmin‑amanlığın təmin edilməsində fəal iştirak edir”.

İki ölkənin enerji sahəsindəki əməkdaşlığına toxunan deputat Sevil Mikayılova bildirib ki, Bakı–Tbilisi–Ceyhan neft kəməri, Cənub Qaz Dəhlizi (Şahdəniz–TANAP–TAP) Avropanın enerji təhlükəsizliyinə strateji töhfədir:

“Azərbaycandan Gürcüstan vasitəsilə 12 ölkəyə ixrac olunan təbii qaz regionun enerji xəritəsini zənginləşdirir. Bu layihələr yalnız iki ölkənin deyil, bütün Avrasiya regionunun enerji asılılığının diversifikasiyasına xidmət edir.

Bakı–Tbilisi–Qars dəmiryolu Şərq–Qərb arasında ən effektiv və qısa marşrutlardan biridir. Yeni inşa edilmiş dəmir yolu şəbəkəsi və liman infrastrukturu “Orta Dəhliz” layihəsinin ayrılmaz hissəsinə çevrilərək yük axınını artırır və logistika xərclərini azaldır. İldən‑ilə tranzit həcmlərinin genişləndirilməsi üçün birgə layihələr icra olunur”.

S.Mikayılova sonda əlavə edib ki, ikitərəfli münasibətlərimizin dinamik inkişafı siyasi etimad, iqtisadi tərəfdaşlıq və ortaq region strategiyası üzərində qurulub.

“Enerji və nəqliyyat sahələrində reallaşan nəhəng infrastruktur layihələri yalnız Azərbaycanın və Gürcüstanın deyil, bütöv Avrasiya məkanının rifahına xidmət edir. Gələcəkdə də bu yüksələn xətt davam edəcək, əməkdaşlığımız yeni səviyyələrə qalxacaqdır” - deputat qeyd edib.