Bəhreyn Daxili İşlər Nazirliyi İran İnqilab Keşikçiləri Korpusu və “Vilayəti-Fəqih” ideologiyası ilə əlaqəli olduğu bildirilən təşkilatın ifşa edildiyini və 41 nəfərin saxlanıldığını açıqlayıb. Nazirliyin yaydığı bəyanatda təhlükəsizlik orqanlarının uzunmüddətli araşdırmalar, təhlükəsizlik hesabatları və prokurorluq tərəfindən aparılan istintaq tədbirləri nəticəsində sözügedən şəbəkəni müəyyən etdiyi bildirilib.

Səudiyyə Ərəbistanı Krallığı öz hava məkanının hər hansı hücum xarakterli hərbi əməliyyatlara dəstək məqsədilə istifadəsinə icazə verməyib. Bu haqda VOA ərəb KİV-lərinə istinadən xəbər verir.

ABŞ-da aprel ayında yaradılan 115 min yeni iş yeri iqtisadçıların gözləntilərini üstələyib. İran ətrafındakı geosiyasi gərginlik və neft qiymətlərindəki artıma baxmayaraq, ABŞ əmək bazarı sabitliyini qoruyur.

ABŞ Mərkəzi Komandanlığı İran limanlarına tətbiq olunan blokada çərçivəsində 57 kommersiya gəmisinin marşrutunun dəyişdirildiyini, üç gəminin isə hərəkətsiz vəziyyətə salındığını açıqlayıb. CENTCOM bildirib ki, əməliyyatların icrası üçün Ərəbistan dənizində ABŞ Hərbi Dəniz Qüvvələrinə məxsus üç esmines fəaliyyət göstərir.

ABŞ, İsrail və İran arasında davam edən qarşıdurmanın sona çatacağına dair gözləntilərin güclənməsi qlobal bazarlarda qızıl qiymətlərinin yüksəlməsinə səbəb olub. İnvestorlar geosiyasi risklərin azalacağına dair siqnalları diqqətlə izləyərkən, spot qızıl və qızıl fyuçersləri həftəlik qazanca doğru irəliləyib.

Hörmüz boğazında gərginlik yenidən yüksəlir. İran mediası ABŞ qüvvələrinin İran neft tankerinə hücum etdiyini iddia edir, Tehran isə buna cavab verildiyini bildirir. Tasnim agentliyinin məlumatına görə, atışmalardan sonra vəziyyət hazırda “sakit” qiymətləndirilsə də, bölgə faktiki qarşıdurma zonasına çevrilib.

İran rəsmiləri ABŞ-la aparılan danışıqlarda müharibənin tam başa çatmasına dair təminatlar tələb etdiklərini bildirirlər. Tehran Hörmüz boğazı və nüvə proqramı ilə bağlı mövqeyində güzəştə getməyəcəyini vurğulayaraq, Vaşinqtonun tələblərinə qarşı çıxdığını açıqlayıb.

ABŞ-ın keçmiş rəsmisi Mark Kimmitt İranın Vaşinqtonun sülh təklifini tam rədd etməməsinin diplomatik imkanlar yaratdığını bildirib. O qeyd edib ki, Tehran nüvə proqramını müzakirə etməkdən imtina edərsə, regionda gərginliyin yenidən artması ehtimalı yüksələcək.

“Hizbullah” Cənubi Livanda İsrail mövqelərinə qarşı yeni hücumlar həyata keçirdiyini açıqlayıb. Təşkilat Biyyada və Rəşaf ətrafında İsrail qüvvələri və hərbi texnikasının hədəfə alındığını bildirərkən, İsrail ordusu son hücumlarda üç hərbçinin yaralandığını bəyan edib.

İranın xarici işlər naziri Seyid Abbas Əraqçi ABŞ-ın son hərbi əməliyyatlarını tənqid edərək Vaşinqtonun diplomatik həll əvəzinə hərbi addımlara üstünlük verdiyini bildirib. O, İranın raket potensialının qorunduğunu vurğulayıb və regionda gərginliyin artdığı bir vaxtda ABŞ-ın Tehranın cavabını gözlədiyini qeyd edib.

ABŞ Mərkəzi Komandanlığı Oman körfəzində İran bayrağı altında üzən üç neft tankerinə qarşı əməliyyat həyata keçirildiyini açıqlayıb. CENTCOM-un məlumatına görə, ABŞ qüvvələri blokadanın pozulmasına cəhd göstərdiyi iddia edilən iki tankeri vurub, üçüncü gəmi isə hərəkətsiz vəziyyətə salınıb.

Avropa İttifaqının böhranların idarə olunması üzrə komissarı Hadja Lahbib Livan əhalisinin yarıdan çoxunun humanitar yardımdan asılı vəziyyətdə olduğunu bildirib.Beyrutda Livan Prezidenti Josef Aun ilə görüşdən sonra danışan Aİ rəsmisi qeyd edib ki, martın 2-dən başlayan müharibə dövründə Avropa İttifaqı Livana 100 milyon avro yardım ayırıb və humanitar yüklərlə altı təyyarə göndərib. Yeddinci yardım təyyarəsinin isə yaxın günlərdə ölkəyə çatacağı gözlənilir.