BAKI,VOA,Yusif Şərifzadə
ABŞ Prezidenti Donald Tramp Suriyanın terrorçuluğa dəstək verən dövlətlər siyahısından çıxarıla biləcəyini açıqlayıb.
VOA xəbər verir ki, Tramp bu barədə Suriya Prezidenti Əhməd əl-Şaraa ilə görüşü zamanı jurnalistlərin sualını cavablandırarkən danışıb.
ABŞ Prezidenti Suriyanın həmin siyahıdan çıxarılması ilə bağlı qərarın verilə biləcəyini bildirərək, bunun mümkün olduğunu söyləyib.
Bundan əvvəl Vaşinqton Suriyanın terrorçuluğa dəstək verən dövlət statusuna yenidən baxıldığını açıqlamışdı. Bu status ABŞ-nin maliyyə yardımı, müdafiə təyinatlı məhsulların ixracı və bəzi maliyyə əməliyyatlarına ciddi məhdudiyyətlər tətbiq olunmasını nəzərdə tutur.
Qeyd edək ki, ötən ay Donald Tramp Suriyaya qarşı ABŞ-nin sanksiyalar proqramını dayandıran sərəncam imzalayıb. Həmin qərar Suriyanın beynəlxalq maliyyə sisteminə çıxışının bərpasına və uzun illər davam edən vətəndaş müharibəsindən sonra ölkənin yenidən qurulmasına dəstək məqsədi daşıyır.