BAKI,VOA,Yusif Şərifzadə
Livanın cənubunda yerləşən Qana qəsəbəsi və Sur şəhəri bölgəsindəki digər yaşayış məntəqələrinə sakinlərin qayıdışı tədricən davam edir. Lakin geri dönənlər ciddi dağıntılarla və yararsız vəziyyətə düşmüş infrastrukturla üzləşirlər.
VOA xəbər verir ki, bölgədə olan mənbələrin məlumatına əsasən, Qana qəsəbəsinin əhalisinin təxminən 90 faizi artıq öz evlərinə qayıdıb. Buna baxmayaraq, yolların, yaşayış evlərinin və mühüm infrastrukturun böyük hissəsinin dağıdıldığı bildirilir.
Məlumata görə, geri qayıdan sakinlər gündəlik həyatın bərpası üçün çətin şəraitdə yaşayırlar. Dağıntılar səbəbindən bir çox ailə əsas xidmətlərdən tam istifadə edə bilmir.
Birləşmiş Millətlər Təşkilatının hesablamalarına görə, Livanda məcburi köçkün düşmüş əhalinin təxminən 40 faizi artıq doğma yaşayış yerlərinə qayıdıb.
Bununla yanaşı, yaşayış məntəqələrinin bərpası və insanların normal həyata dönməsi üçün genişmiqyaslı yenidənqurma işlərinə ehtiyacın olduğu vurğulanır.