BAKI,VOA,Yusif Şərifzadə

Beynəlxalq münasibətlər üzrə ekspert Yossi Mekelberqin fikrincə, Livanla bağlı memorandumun müddəaları ABŞ və İsrail arasında ciddi fikir ayrılığı yaradıb.

VOA xəbər verir ki, Londondan danışan ekspert bildirib ki, ABŞ Prezidenti Donald Tramp və vitse-prezident Cey Di Vens Benyamin Netanyahunu Livanda həddindən artıq hərbi gücdən istifadə etməklə memorandumun icrasına mane olmaqda ittiham ediblər.

Yossi Mekelberq hesab edir ki, mövcud vəziyyətdə İsrailin qarşısında bir neçə mümkün seçim var.

Birinci variant Benyamin Netanyahunun Vaşinqtonun mövqeyini qəbul etməsi və Hizbullahla bağlı məsələlərin, eləcə də sərhəd təhlükəsizliyinin diplomatik yollarla həllinə üstünlük verməsidir.

İkinci ehtimala görə, Netanyahu bir neçə gün daha hərbi əməliyyatları davam etdirə və İsrailin memorandumun tərəfi olmadığını əsas gətirərək Livandakı fəaliyyətini Hizbullah və İranla bağlı təhlükəsizlik narahatlıqları ilə izah edə bilər.

Ekspertin sözlərinə görə, İsrail bu halda əldə olunacaq istənilən razılaşmada öz maraqlarının nəzərə alınmasını tələb edə bilər.

Mekelberq üçüncü və ən riskli ssenarinin Netanyahunun ABŞ-nin mövqeyini nəzərə almadan hərbi əməliyyatları davam etdirməsi olduğunu bildirib.

Onun fikrincə, belə bir addım həm İsrail üçün ciddi strateji risklər yaradar, həm də Livan əhalisi üçün ağır nəticələrə səbəb ola bilər.