BAKI,VOA,Yusif Şərifzadə
Livanın cənubundakı Nəbatiyyə şəhəri və ətraf ərazilər İsrail qüvvələrinin hücumlarına məruz qalmaqda davam edir.
VOA xəbər verir ki, bölgədən yayılan məlumatlara görə, şəhərin kənar hissələrində fasilələrlə artilleriya atəşləri və raket zərbələri qeydə alınır.
Məlumata əsasən, İsrail qüvvələri yaşayış məntəqələrinin yerləşdiyi əraziləri hədəfə alıb.
Hücumlar nəticəsində beşmərtəbəli yaşayış binasının tamamilə dağıldığı bildirilir.
Nəbatiyyə şəhərində və yaxın yaşayış məntəqələrində çoxsaylı tikililərə ciddi ziyan dəyib.
Bölgədə olan sakinlər dağıntılar altında qalan əşyalarını xilas etməyə çalışsalar da, əksər hallarda evlərində yalnız xarabalıqlarla qarşılaşdıqlarını bildiriblər.
Məlumata görə, davam edən hücumlar səbəbindən bir çox ailə hələ də öz evlərinə qayıda bilmir.
Bölgədə təhlükəsizlik vəziyyətinin qeyri-sabit olaraq qaldığı və yeni hücumlar ehtimalının davam etdiyi qeyd olunur.