BAKI,VOA Orxan Qədirzadə

ABŞ və İran arasında davam edən danışıqlar fonunda Qətərin yüksək səviyyəli nümayəndə heyəti Tehrana səfər edib. Səfərin əsas məqsədinin tərəflər arasında diplomatik prosesin irəlilədilməsi və aparılan müzakirələrin vəziyyətinin qiymətləndirilməsi olduğu bildirilir.

İranın yarırəsmi xəbər agentliklərinin yaydığı məlumata görə, nümayəndə heyətinə Qətərin xarici işlər nazirinin müşaviri rəhbərlik edir.

Məlumata əsasən, Qətər nümayəndələri Tehranda İran rəsmiləri ilə bir sıra görüşlər keçiriblər. Tərəflər ABŞ və İran arasında davam edən diplomatik təmasların mövcud vəziyyətini müzakirə edərək prosesin gələcək istiqamətləri ətrafında fikir mübadiləsi aparıblar.

Görüşlərin məzmunu və müzakirə olunan konkret məsələlərlə bağlı əlavə məlumat açıqlanmayıb.

Son aylarda bölgədə təhlükəsizlik vəziyyəti ciddi şəkildə gərginləşib. Fevralın 28-dən etibarən ABŞ və İsrailin İrana qarşı həyata keçirdiyi hərbi əməliyyatlar regional böhranın dərinləşməsinə səbəb olub.

Aprelin 8-də Pakistanın vasitəçiliyi ilə əldə olunmuş atəşkəs razılaşması qüvvəyə minib. Həmin vaxtdan etibarən tərəflər arasında daha geniş və uzunmüddətli siyasi razılaşmanın əldə olunması istiqamətində diplomatik səylər davam etdirilir.

Analitiklər hesab edirlər ki, Qətərin vasitəçilik təşəbbüsləri Yaxın Şərqdə gərginliyin azaldılması və Vaşinqtonla Tehran arasında dialoqun davam etdirilməsi baxımından mühüm rol oynaya bilər.

Qətər son illərdə regionda müxtəlif münaqişələrin həllində vasitəçi kimi çıxış edib və tərəflər arasında əlaqələrin qurulmasında fəal diplomatik fəaliyyət göstərib. Tehranda keçirilən son görüşlərin də ABŞ-İran münasibətlərində növbəti mərhələnin formalaşmasına təsir göstərə biləcəyi istisna edilmir.