BAKI,VOA Orxan Qədirzadə

Səudiyyə Ərəbistanı bölgədə hərbi gərginliyin artması ilə bağlı xəbərdarlıq edib və diplomatik səylərin, xüsusilə Pakistanın vasitəçilik təşəbbüslərinin dəstəklənməsinə çağırış edib.

VOA xəbər verir ki, Səudiyyə Ərəbistanı Xarici İşlər Nazirliyi yaydığı bəyanatda bölgədə mövcud hərbi eskalasiyadan narahatlıq ifadə edərək, gərginliyin azaldılmasının və təmkinli davranışın vacibliyini vurğulayıb. Rəsmi Ər-Riyad mövcud vəziyyətin daha geniş regional sabitliyi təhlükə altına saldığını bildirib.

Bəyanatda həmçinin Pakistanın vasitəçilik səylərinin və diplomatik təşəbbüslərin dəstəklənməsi çağırışı yer alıb. Səudiyyə tərəfi qeyd edib ki, siyasi həll yolları regionu daha böyük qarşıdurmadan qorumaq üçün yeganə çıxış yoludur.

Nazirlik xüsusilə Hörmüz boğazında beynəlxalq dəniz hərəkətinin əvvəlki normal rejiminə qaytarılmasının vacibliyini qeyd edib. Bildirilib ki, ticarət gəmilərinin təhlükəsiz və maneəsiz hərəkəti təmin olunmalıdır.

Bölgədə gərginlik ABŞ ilə İran arasında davam edən qarşıdurma fonunda daha da artıb. Məlumata görə, tərəflər arasında qarşılıqlı hərbi təhdidlər və dəniz əməliyyatları ilə bağlı insidentlər qeydə alınıb. Eyni zamanda, ABŞ tərəfindən “Azadlıq layihəsi” adlı dəniz müşayiət əməliyyatının başladıldığı bildirilib.

Münaqişə fonunda Hörmüz boğazı ətrafında bir neçə insident baş verib, bu isə qlobal enerji daşımalarına təsir riski yaradıb. Region ölkələri, o cümlədən Səudiyyə Ərəbistanı, Birləşmiş Ərəb Əmirlikləri və digər Körfəz dövlətləri vəziyyətin daha da kəskinləşməsindən narahatdır.

Hazırda ABŞ ilə İran arasında dolayı diplomatik kanallar vasitəsilə mesajların ötürüldüyü, lakin hələlik ciddi irəliləyiş əldə olunmadığı bildirilir.