BAKI,VOA, Nailə Babazadə

İsrailin Baş naziri Benyamin Netanyahu cümə günü Hizbullahı Livanla sülh razılaşmasının əldə olunması istiqamətindəki səyləri "sabotaj etməyə" çalışmaqda günahlandırıb.

VOA xəbər verir ki,Livanla atəşkəs müqaviləsinin müddəti uzadıldıqdan sonra verdiyi ilk açıqlamada Netanyahu bildirib: "Biz İsrail və Livan arasında tarixi sülhə nail olmaq üçün bir proses başlatmışıq və Hizbullahın bunu sabotaj etməyə çalışdığı bizə aydındır".

Bu şərhlər İsrail ordusunun "atəşkəsin pozulmasına" cavab olaraq Livanın cənubundakı bir kənddə Hizbullahın hədəflərinə zərbə endirməsindən sonra səslənib. Hücumdan əvvəl sakinlərə ərazini tərk etmək barədə xəbərdarlıq edilib.

Ordu tərəfindən verilən məlumatda deyilir: "Az öncə ordu dünən İsrailin Ştula qəsəbəsinə raketlərin atıldığı Deyr Amis bölgəsindəki hərbi strukturlara zərbə endirib. Hədəf alınan tikililər Hizbullah terror təşkilatı tərəfindən əsgərlərə və İsrail dövlətinə qarşı terror fəaliyyətlərini həyata keçirmək üçün istifadə olunurdu".

Ordunun ərəbdilli sözçüsü Aviçay Adrae daha əvvəl Deyr Amis sakinlərinə müraciət edərək "evlərinizi dərhal təxliyə edin və ərazidən ən azı 1000 metr kənara uzaqlaşın" deyə xəbərdarlıq etmişdi. O, "X" platformasında Hizbullahın terror fəaliyyəti səbəbindən ordunun bölgədə hədəflənmiş əməliyyatlar keçirdiyini qeyd edib.

Deyr Amis Livanın "Sarı xətt" kimi tanınan hissəsinin şimalında yerləşir. İsrail qüvvələri atəşkəsə baxmayaraq bu xəttin arxasında fəaliyyətlərini davam etdirir.

İran məsələsinə gəlincə, Netanyahu nə vaxt danışdıqlarını dəqiqləşdirməsə də, ABŞ Prezidenti Donald Trampla "mükəmməl bir söhbət etdiyini" bildirib. Baş nazir əlavə edib: "O, İrana həm iqtisadi, həm də hərbi cəhətdən çox güclü təzyiq göstərir. Biz tam əməkdaşlıq şəraitində işləyirik".