BAKI,VOA, Fərid Mikayılov

Səudiyyə Ərəbistanı hökuməti regionda təhlükəsizlik və sabitliyə yönələn təhdidlərə qarşı mövqeyini bir daha açıqlayıb.

VOA xəbər verir ki, krallıq digər ölkələrin suverenliyinin pozulmasını və regionda gərginliyin artırılmasına yönələn cəhdləri qəti şəkildə rədd etdiyini bildirib.

Məlumata əsasən, Ciddə şəhərində keçirilən Nazirlər Kabinetinin iclasına vəliəhd şahzadə Məhəmməd bin Salman rəhbərlik edib.

Qeyd olunub ki, hökumət İraq ərazisindən buraxılan pilotsuz uçuş aparatları ilə Səudiyyə Ərəbistanı və Körfəz Əməkdaşlıq Şurası ölkələrinə qarşı həyata keçirilən hücumları sərt şəkildə pisləyib və İraq hökumətini bu təhdidlərin qarşısını almaqda məsuliyyət daşımağa çağırıb.

Bildirilib ki, Kabinet Səudiyyə Silahlı Qüvvələrinin ölkənin təhlükəsizliyinin qorunmasında göstərdiyi fəaliyyəti yüksək qiymətləndirib və hücumlar nəticəsində zərər görmüş enerji obyektlərində istehsalın qısa müddətdə bərpasını müsbət hal kimi dəyərləndirib.

Məlumata görə, hökumət enerji sektorunun dayanıqlığını və qlobal bazarlara tədarükün fasiləsizliyini təmin etmək qabiliyyətini vurğulayıb.

Qeyd edilib ki, iclasda həmçinin Məkkə və Mədinə ziyarətçilərinə xidmət sahəsinin inkişafı, kosmik tədqiqatlar çərçivəsində “Şəms” peykinin uğurlu buraxılışı, eləcə də təhsil və səhiyyə sahələrinin beynəlxalq nailiyyətləri müzakirə olunub.

Bildirilib ki, ölkənin şəhərlərinin “Ağıllı Şəhər İndeksi 2026”da irəliləyişi və ekoloji təşəbbüslər çərçivəsində milyonlarla ağacın əkilməsi Səudiyyə Ərəbistanında davamlı inkişafın göstəricisi kimi qiymətləndirilib.