BAKI,VOA

Səudiyyə Ərəbistanı Krallığı İraq ərazisindən ölkəyə və digər Körfəz dövlətlərinə qarşı davam edən pilotsuz uçuş aparatı (dron) hücumlarına görə rəsmi Bağdada kəskin etirazını bildirib. Bazar günü İraqın Səudiyyə Ərəbistanındakı səfiri Səfiyə əs-Süheyl Krallığın Xarici İşlər Nazirliyinə çağırılıb.

VOA xəbər verir ki, Səudiyyə Ərəbistanı Xarici İşlər nazirinin siyasi məsələlər üzrə müavini dr. Səud əs-Sati etiraz notasını səfirə təqdim edərək, İraq torpaqlarından Krallığa və Körfəz ölkələrinə yönələn hücumları və təhdidləri kəskin şəkildə pisləyib.

Dr. Səud əs-Sati görüş zamanı vurğulayıb ki, İraq tərəfi bu cür təhdid və hücumların qarşısını almaq üçün məsuliyyətlə hərəkət etməlidir. Səudiyyə tərəfi bəyan edib ki, dövlətlərin suverenliyinin pozulması və regionun sabitliyinin təhdid edilməsi cəhdləri qətiyyən qəbulolunmazdır.

Krallığın rəsmi mövqeyində qeyd olunur ki, Səudiyyə Ərəbistanı öz təhlükəsizliyini qorumaq və ərazilərini hər cür təcavüzdən müdafiə etmək üçün lazım olan bütün tədbirləri görmək hüququnu özündə saxlayır.
Bu hadisə, son günlər İraqın daxilindəki bəzi silahlı qrupların pilotsuz təyyarələrlə bölgə ölkələrini hədəf alması fonunda diplomatik münasibətlərin kəskinləşdiyini göstərir.