BAKI,VOA, Nailə Babazadə

Suriyanın Maliyyə naziri Məhəmməd Yusr Berniyyə ölkə iqtisadiyyatının uzunmüddətli böhrandan sonra rəsmən bərpa və yenidənqurma mərhələsinə qədəm qoyduğunu elan edib.

VOA xəbər verir ki, nazirliyin binasında təşkil edilən mətbuat konfransında çıxış edən Berniyyə, 2026-cı ildə iqtisadi artımın 10 faizdən çox olacağını gözlədiklərini bildirib.

Nazir şəffaflığın təmin edilməsi və vətəndaşların dövlət maliyyəsini daha asan başa düşməsi üçün 2026-cı il büdcəsinin "vətəndaş versiyası"nın yayımlandığını diqqətə çatdırıb. Bu sənəd maliyyə ilinin əsas hədəflərini sadə dildə izah edir. Proqnozlara görə, 2026-cı ildə dövlət gəlirləri 958,8 milyard, xərcləri isə 1156,7 milyard yeni Suriya lirəsi (təxminən 10,5 milyard dollar) təşkil edəcək.

Büdcə xərclərinin strukturuna dair məlumat verən nazir bildirib ki, vəsaitlərin 27 faizi investisiya layihələrinə, 60 faizi cari xərclərə, 13 faizi isə sosial müdafiə və subsidiyalara yönəldiləcək. Gəlir hissəsində isə vergi və rüsumlar 50 faiz, neft və qaz sektoru 28 faiz, digər mənbələr isə 22 faiz paya malik olacaq. Berniyyə vurğulayıb ki, hökumət yeni vergi artımı planlaşdırmır və mövcud sistemi investorlar üçün daha sadə formaya salmağı hədəfləyir.

İşçilərin rifahının yaxşılaşdırılması məqsədilə maaş islahatlarının davam etdirildiyi qeyd olunub. Yeni sistemə əsasən, çalışanlara ildə iki dəfə artım veriləcək ki, bunlardan biri inflyasiyaya, digəri isə iş performansına əsaslanacaq. Nazir həmçinin səhiyyə və təhsil xidmətlərinin keyfiyyətinin artırılmasını prioritet elan edib. Suriyanın artıq xarici investisiyalar üçün cəlbedici məkana çevrildiyini deyən Berniyyə, özəl sektorun gücləndirilməsi və yoxsulluqla mübarizə strategiyasının tətbiqi istiqamətində işlərin sürətləndiyini əlavə edib.