BAKI,VOA, Nailə Babazadə

İsrail ordusunun martın 2-dən bəri Livanın cənubunda başlatdığı genişmiqyaslı hərbi əməliyyatlar davam edir.

VOA xəbər verir ki, Livanın rəsmi NNA agentliyinin məlumatına görə, son hava hücumları nəticəsində müxtəlif bölgələrdə ümumilikdə 9 nəfər dünyasını dəyişib, bir məscid isə tamamilə dağıdılıb.

Nəbatiyə şəhərinin Beraşit qəsəbəsinə endirilən zərbələr nəticəsində yerli məscid hədəf alınaraq tamamilə uçurulub. Sur şəhəri yaxınlığındakı sənaye bölgəsinə edilən hücumda isə 2-si qadın olmaqla 5 nəfər həlak olub. Eyni zamanda, Ayn Baal qəsəbəsində bir evin vurulması nəticəsində eyni ailədən 2 nəfər həyatını itirib, dağıntılar altında qalan digər şəxslərin xilasetmə işləri davam edir.

İsrail ordusu havadan və dənizdən həyata keçirdiyi intensiv hücumlarla bərabər, quruda da işğal zonasını genişləndirmək qərarına gəlib. Livan Səhiyyə Nazirliyinin son məlumatına görə, martın 2-dən bu yana ölkədə ölənlərin sayı 1368 nəfərə çatıb. Livan hökuməti isə hücumlar səbəbindən yurd-yuvasından didərgin düşən insanların sayının 1 milyon 162 min nəfəri keçdiyini bəyan edib.